Ź Biełarusi syšoŭ jašče adzin znakavy inviestar — niamieckaja kampanija Carl Zeiss, jakaja źjaŭlajecca adnym z suśvietnych lidaraŭ u vytvorčaści optyki, paviedamlaje Plan B.
U červieni 2024 hoda Jeŭrasajuz uvioŭ sankcyi suprać ich šmathadovaha partniora BiełOMA. Kab vyjści z kapitału sumiesnaha pradpryjemstva «Cejs-BiełOMA», kiraŭnictvu Carl Zeiss spatrebiłasia niekalki tydniaŭ.
Carl Zeiss byŭ u pieršaj dziasiatcy bujnych niamieckich biznesaŭ, jakija arhanizavali ŭ 1990-ch vytvorčaść na terytoryi Biełarusi. Adbyłosia heta ŭ 1995 hodzie ŭ pamiaškańniach i cechach Biełaruskaha optyka-miechaničnaha abjadnańnia. BiełOMA tady prachodziła praź ciažki praces rekanviersii. Źjaŭleńnie ŭ jakaści partniora viadomaj i profilnaj zachodniaj kampanii, jak mierkavałasia, pavinna było zrabić jaje mienš balučaj.
U sumiesnym pradpryjemstvie «Cejs-BiełOMA» niemcy atrymali 60% i za niekalki hadoŭ arhanizavali ŭzornuju vytvorčaść linzaŭ, miechaničnych kampanientaŭ, mikraskopaŭ i miedycynskich pryboraŭ. Asnoŭnymi ich atrymalnikami stali zavody Carl Zeiss u Hiermanii, ZŠA i Francyi.
Na piku na vytvorčaści było zaniata kala 400 čałaviek. Pa hrošach, układzienych u SP, i abjomach pradukcyi, jakija vypuskajucca im, na inviestycyjnaj karcie Biełarusi «Cejs-BiełOMA» adnosiŭsia da sieradniačka. Ale jaho były hienieralny dyrektar Uvie Kieler faktyčna staŭ duajenam usich zamiežnych inviestaraŭ u Biełarusi.
Pry jaho aktyŭnym udziele byŭ stvorany i doŭhi čas dosyć efiektyŭna funkcyjanavaŭ Kansultatyŭny saviet pa zamiežnych inviestycyjach pry biełaruskim uradzie.
Ciapier čytajuć
Vybityja dźviery, maski-šou, zatrymańnie top-mieniedžaraŭ. Pačaŭsia pahrom «Jeŭraopta»33
Kamientary