«Nibyta nanios škodu ŭ miljon jeŭra?» Što viadoma pra probašča Hienrycha Akałatoviča, jaki dzieviać miesiacaŭ znachodzicca za kratami
Rasśledavańnie pa spravie śviatara zaviaršajecca, sud projdzie ŭ zakrytym režymie.
Dzieviać miesiacaŭ tamu byŭ zatrymany, a zatym źmieščany ŭ SIZA KDB probašč parafii Śviatoha Juzafa ŭ Vałožynie ksiondz Hienrych Akałatovič. Infarmacyi pra jaho stan niama amal nijakaj, ale viadoma, što śviatar trymajecca, nie padaje ducham. Pa abvinavačvańni ŭ zdradzie dziaržavie probašču pahražaje ad 7 da 15 hadoŭ źniavoleńnia.
Nijakich aficyjnych źviestak pa spravie śviatara dahetul niama, sutnaść abvinavačvańnia nie nazyvajecca. Sud, jaki ŭžo chutka adbudziecca, budzie zakrytym — tudy nie zmohuć trapić svajaki i parafijanie, pa vynikach suda nijakich źviestak pra spravu taksama nie źjavicca.
Ale Katolik.life udałosia daviedacca ad viernikaŭ, znajomych ź situacyjaj, niekatoryja źviestki. Śviatara abvinavačvajuć u tym, što jon byccam by pieradaŭ kamuści niejkuju sakretnuju infarmacyju.
Pavodle źviestak, jakija dajšli da viernikaŭ, škodu, nibyta naniesienuju dziaržavie dziejańniami śviatara, aceńvajuć u vielmi bujnuju sumu i patrabujuć jaje spłacić. U razmovach nazyvajecca suma kala 1 młn jeŭra ŭ ekvivalencie (bolej za 3 młn rubloŭ). U košt spahnańnia heta sumy namierany ŭklučyć hrošy, jakija kanfiskavali pry aryšcie ksiandza Hienrycha — jaho asabistyja źbieražeńni i achviaravańni parafii, miarkujuć vierniki.
Adnak vinu śviatar pa-raniejšamu nie pryznaje.
«Jakaja zdrada, kali jon lubić Radzimu bolš, čym tyja, chto jaho abvinavačvaje», — adznačajuć znajomyja z ksiandzom Hienrycham.
Jany ličać, što probašča pryznajuć vinavatym i asudziać, kančatkova zabraŭšy kanfiskavanyja hrošy. A potym, jak spadziajucca vierniki, jaho mohuć vyzvalić praz praceduru pamiłavańnia, bo «pažyły i chvory čałaviek u turmie nie patrebny».
U apošni čas ad śviatara nie prychodzili listy, ale viadoma, što rasśledavańnie spravy zaviaršajecca, i sud moža być pryznačany ŭžo na vierasień ci kastryčnik. U apošnich listach ksiondz Hienrych pisaŭ, što spadziajecca na zastupnictva Papy Rymskaha, i prasiŭ nie spyniać malitvu.
Što tyčycca jašče dvuch miascovych žycharoŭ, jakich zatrymlivali pa spravie śviatara, to jany ŭžo vyzvalenyja z-pad varty — jany na voli, ale ničoha nie mohuć raspaviadajuć pra sutnaść spravy.
Ciapier čytajuć
Addanaha jabaćku, jaki abražaŭ Śviatłanu Cichanoŭskuju ŭ Threads, kinuli za kraty5
Kamientary