Kampanija Apple zabłakavała dostup da adnoj sa svaich płatform dla ŭsich klijentaŭ ź Biełarusi i Rasii
Kampanija Apple raptoŭna apaviaściła raspracoŭščykaŭ kantentu ź Biełarusi i Rasii, što ciapier ŭsie rekłamnyja instrumienty bujnoj płatformy Apple Search Ads dla ich niedastupnyja. Što ad hetaha stračvajuć biełarusy?
Jak piša telehram-kanał iOS Dev, Apple dasyłaje biełaruskim i rasijskim klijentam listy ź infarmacyjaj ab spynieńni ich dostupu da rekłamnaj płatformy Apple Search Ads.
U aficyjnym liście kampanii havorycca, što błakiroŭka pačała dziejničać z 15 žniŭnia.
Pryčyna błakiroŭki dakładna nie tłumačycca, tolki zhadvajecca asnoŭny jaje kryter — kraina pachodžańnia klijentaŭ. Inšyja krainy, akramia Biełarusi i Rasii, nie nazyvalisia.
Apple Search Ads ličycca płatformaj № 1 dla rekłamy iOS-dadatkaŭ u kramie App Store. Jana daje rekłamadaŭcam pa ŭsim śviecie mahčymaść chutkaha pryciahnieńnia novych karystalnikaŭ u abychod surjoznaj kankurencyi na rynku, a taksama abaraniaje ich brendy i aŭtarskija pravy ad starońnich zamachaŭ.
Płatforma taksama daje klijentam padrabiaznuju statystyku i rekamiendacyi pa paśpiachovym prasoŭvańni dadatkaŭ u App Store.
Usio heta aznačaje, što biełaruskim raspracoŭščykam dadatkaŭ dla Apple ciapier budzie značna składaniej kankuravać z hulcami ź inšych krain, a ich pradukty z bolšaj dolaj vierahodnaści nie ŭbačać karystalniki pa ŭsim śviecie, što adčuvalna adabjecca na ich prybytku i mahčymaści stvarać novyja dadatki.
Kamientary
Nie?
Pravilnyje sankcii, v točku.