MZS Litvy nazvała inicyjatyvu Rasii nakont źmieny marskoj miažy ŭ Bałtyjskim mory pravakacyjaj
U sieradu dla padrabiaznaha tłumačeńnia ŭ MZS budzie zaprošany pradstaŭnik Rasii, a adkaz Litvy budzie ŭzhodnieny z partniorami.
Učora Rasija prapanavała źmianić miažu ź Litvoj i Finlandyjaj u Bałtyjskim mory ŭ adnabakovym paradku.
Z prajekta vynikaje, što Rasija źbirajecca abviaścić svaimi ŭnutranymi marskimi vodami častku akvatoryi na ŭschodzie Finskaha zaliva, a taksama pobač z haradami Bałtyjsk i Zielenahradsk u Kalininhradskaj vobłaści. Płanujecca źmianić hieahrafičnyja kaardynaty kropak, jakija vyznačajuć stanovišča zychodnych linij, ad jakich admierajecca šyrynia terytaryjalnaha mora Rasii, prylehłaj zony ŭźbiarežža i vyspaŭ.
Aŭtary zakonaprajekta zajavili, što ciapierašnija kaardynaty ŭstanoŭlenyja pastanovaj Saŭmina SSSR ad 1985 hoda i «nie ŭ poŭnaj miery adpaviadajuć sučasnaj hieahrafičnaj abstanoŭcy», bo byli zafiksavanyja «pa marskich navihacyjnych kartach drobnaha maštabu», zasnavanych «na pracach siaredziny XX stahodździa».
U MZS Litvy zajaŭlajuć, što takija dziejańni Rasii razhladajucca jak naŭmysnaja, metanakiravanaja, narastajučaja pravakacyja, nakiravanaja na zapałochvańnie susiednich krain i ich hramadskaści, piša LRT.
«Heta jašče adzin dokaz taho, što ahresiŭnaja i revizijanisckaja palityka Rasii ujaŭlaje pahrozu biaśpiecy susiednich dziaržaŭ i ŭsioj Jeŭropy», — havorycca ŭ paviedamleńni ministerstva.
Viedamstva infarmuje, što ŭ sieradu dla padrabiaznaha tłumačeńnia budzie zaprošany pradstaŭnik Rasii, a adkaz Litvy budzie ŭzhodnieny z partniorami.
«Litva nahadvaje i zaklikaje Rasiju pavažać i vykonvać ahulnapryznanyja pryncypy i normy mižnarodnaha prava, a taksama mižnarodnyja i dvuchbakovyja pahadnieńni ab nieparušnaści miežaŭ, a mienavita: damovu ab asnovach miždziaržaŭnych adnosin 1991 hoda, damovu ab dziaržaŭnaj miažy 1997 hoda, dahavor ab raźmiežavańni vyklučnaj ekanamičnaj zony i kantynientalnaha šelfa ŭ Bałtyjskim mory 1997 hoda, pahadnieńnie ab pierasiačeńni vyklučnych ekanamičnych zon i miežaŭ kantynientalnaha šelfu ŭ Bałtyjskim mory 2005 hoda, a taksama inšyja pahadnieńni», — havorycca ŭ paviedamleńni.
Staršynia parłamienckaha kamiteta pa nacyjanalnaj biaśpiecy i abaronie Arvidas Pocius ličyć, što płany Rasii pa źmienie miežaŭ ź Litvoj i Finlandyjaj u Bałtyjskim mory varta razhladać jak čarhovaje zapałochvańnie, sprobu adhavaryć zachad ad dapamohi Ukrainie.
«Ja dumaju, heta čarhovaja sproba zapałochać i pahražać. Rasieja choča adhavaryć zachad ad dapamohi Ukrainie, i ŭ hetaj rytorycy niama ničoha novaha», — skazaŭ Pocius ahienctvu ELTA.
Ciapier čytajuć
Biełarusy sustrakajuć vyzvalenych palitviaźniaŭ u Vilni FOTY i VIDEA2
Kamientary