Chadarkoŭski: Nas čakaje novaja chałodnaja vajna na bližejšyja 10-15 hadoŭ
Adzin ź lidaraŭ rasijskaj apazicyi, były kiraŭnik naftavaj kampanii JUKAS Michaił Chadarkoŭski patłumačyŭ svaju zajavu ab tym, što Ukraina i Zachad užo faktyčna prajhrali vajnu, i raskazaŭ, ci jość vyjście.
Jak pisała «Naša Niva», Michaił Chadarkoŭski na adnym z vystupaŭ u Hiermanii vykazaŭ vielmi nieaptymistyčny prahnoz raźvićcia vajny va Ukrainie. U intervju Bild jon bolš padrabiazna patłumačyŭ svaju pazicyju.
«My majem spravu z deindustryjalizacyjaj Zachadu. De-fakta na siońnia Zachad źbiraje snarady ŭ drobnasieryjnaj vytvorčaści. Zrazumieła, što heta ŭ paraŭnańni z kanviejernaj vytvorčaściu nie daje taho ŭzroŭniu pradukcyjnaści pracy i efiektyŭnaści».
Na pohlad biznesmiena, hetaja situacyja mahła by być źmieniena ŭ vypadku atrymańnia pramysłovaściu Zachadu dziesiacihadovaj zamovy. Dla jaje vykanańnia byli b źmienienyja pramysłovyja płoščy i abstalavańnie.
«I ŭ hetym vypadku taja vytvorčaja efiektyŭnaść, jakaja jość u zachodniaj industryi, pierakryvaje rasijskuju pryblizna ŭ dva-try razy pry paraŭnalnych mahutnaściach. Prosta pradukcyjnaść pracy ŭ dva-try razy vyšejšaja na Zachadzie», — zaŭvažaje Chadarkoŭski.
Pa słovach apazicyjaniera, u ramkach Miunchienskaj kanfierencyi jamu stała zrazumieła, što takoje rašeńnie budzie pryniata.
Ale jon źviartaje ŭvahu na nastupstvy: «Hety dziesiacihadovy cykł stvaraje intencyju chałodnaj vajny. Chałodnaja vajna, imavierna, na bližejšyja 10, a to i 15 hadoŭ — niepaźbiežnaść. I da hetaha treba być hatovymi».
«Na jeŭrapiejskim kantyniencie tolki dvie mahutnyja armii — rasijskaja i ŭkrainskaja»
Rasijski miljarder zaŭvažaje, što za dva hady situacyja na froncie radykalna źmianiłasia. Pa-pieršaje, vajskova-pramysłovy kompleks Rasii vyjšaŭ na toj abjom, jaki jon u pryncypie moža vydavać. Pa-druhoje, radykalna źmianiłasia armija.
«Zachodnija hienierały, jakija kažuć duraści pra toje, što rasijskaja armija padčas hetaj vajny asłabieła, zusim nie razumiejuć situacyju. Mahčyma, jana asłabieła ŭ ramkach niejkaj inšaj vajny, dla jakoj značeńnie budzie mieć resurs u samalotaŭ, u braniatechniki, niejkija hihanckija armii.
Ale dla hetaj kankretnaj vajny [vykarystoŭvajucca] taktyka dronavaj vajny, tannaja stvałavaja artyleryja, efiektyŭnaja rabota małymi hrupami, sistemy radyjo-elektronnaj baraćby», — padkreślivaje Chadarkoŭski i adznačaje, što ličyć, što ciapier na jeŭrapiejskim kantyniencie jość dźvie surjoznyja armii — heta rasijskaja i ŭkrainskaja.
«Mahčyma, ź ciaham času, praź niekalki hadoŭ, zachodnija armii ŭ pracesie asvajeńnia ich vopytu zmohuć hetym skarystacca. Ale siońnia, zapłaciŭšy vielmi vialikuju canu dziasiatkami tysiač čałaviečych žyćciaŭ, my majem voś hetyja armii na kantyniencie», — zaŭvažaje Chadarkoŭski.
Chadarkoŭski: Sioleta Ukraina stracić Charkaŭ, letam 2025 — Adesu. Lvoŭ zachavajecca, kali tudy ŭvojdzie NATA
Pientahon pra situacyju na froncie va Ukrainie: Situacyja składanaja, vyklikaje niepakoj
Budanaŭ maluje zmročnuju karcinu situacyi na froncie
Jeŭropie treba dziesiać hadoŭ, kab całkam padrychtavacca da abarony — kiraŭnik Rheinmetal
Kamientary