U jakich rehijonach Biełarusi Paźniak pieramoh Łukašenku na vybarach-1994?
U rodnym Iŭjeŭskim rajonie Zianona Paźniaka padtrymali 40% vybarcaŭ.
24 krasavika Zianon Paźniak adznačaje 80-hodździe. Biassprečna, heta adzin z samych paznavalnych biełaruskich palitykaŭ. Biezadnosna taho, ci padzialali ludzi jaho pohlady, dziejnaść Paźniaka i Biełaruskaha narodnaha fronta pad jaho kiraŭnictvam stali jarkaj staronkaj u historyi krainy.
U 1994 hodzie Paźniak zmahaŭsia za pasadu pieršaha prezidenta Biełarusi. Tyja vybary — znachodka dla amataraŭ elektaralnaj hieahrafii. Šeść kandydataŭ — Alaksandr Łukašenka, Viačasłaŭ Kiebič, Zianon Paźniak, Alaksandr Dubko, Vasil Novikaŭ — prapanoŭvali roznaje bačańnie šlachoŭ raźvićcia Biełarusi.
Prosta acanicie ŭzrovień baraćby ŭ Savieckim rajonie Minska — za Šuškieviča tut prahałasavali 23,4% vybarcaŭ, za Łukašenku — 21,6%, za Paźniaka — 21%, za Kiebiča — 20,7%!
Dahetul možna pačuć mierkavańni pra karekciroŭku vynikaŭ vybaraŭ na miescach na karyść tahačasnaha premjer-ministra Viačasłava Kiebiča. Administratyŭny resurs sapraŭdy moh być vykarystany, ale praz 30 hadoŭ acanić stupień falsifikacyj (navat kali jany i byli) składana, amal niemahčyma. Historykam zastajecca analizavać aficyjnyja ličby.
Takim čynam, u jakich rehijonach Zianon Paźniak byŭ pieramožcam vybaraŭ?
Heta vosiem administratyŭnych adzinak.
1) Iŭjeŭski rajon — radzima Zianona Paźniaka. Tut za ziemlaka prahałasavali 40% vybarcaŭ!
2-3) Smarhoń i Smarhonski rajon. U toj čas harvykankam i rajvykankam isnavali asobna, tamu vyniki hałasavańnia padzielenyja. U Smarhoni za Paźniaka było 38% (a ŭ Łukašenki tolki treciaje miesca), a ŭ susiednich vioskach — 34%.
4) Maładziečna — pieršy vialiki horad za Zianona, tut jon nabraŭ 32,3%. Darečy, mienavita ŭ Maładziečnie zafiksavali anamalna vialikuju kolkaść hałasoŭ «suprać usich» — bolš za 15%. Mahčyma, heta byŭ pratest suprać taho, što miascovy mer Hienadź Karpienka tak i nie trapiŭ u śpis kandydataŭ u prezidenty. U navakolnych vioskach u Paźniaka taksama niamała — 26,9%, ale dla pieramohi hetaha nie chapiła.
5) Lida — tut situacyja padobnaja. Za Paźniaka prahałasavali 31,8%, Łukašenka adstaŭ ad jaho. U lidskich vioskach Zianon nabraŭ 29,8%, ale hetaha nie chapiła dla pieramohi.
6) Vilejka — baraćba była šalonaja. U Paźniaka 31,6%, u Łukašenki 31,3%. Kali pieravieści ŭ realnyja ličby, to roźnica skłała ŭsiaho 50 hałasoŭ.
7) Astraviecki rajon. Na miescy budučaha budaŭnictva AES Łukašenka staŭ tolki čaćviortym (15%). Jon prapuściŭ napierad i Dubko (18%), i Kiebiča (21%), i Paźniaka (27%).
8) Brasłaŭski rajon. Na paŭnočnym zachadzie Biełarusi Paźniaku chapiła dla pieramohi 26%. Roźnica z Łukašenkam — 0,3% ci pryblizna tyja samyja 50 hałasoŭ.
| Paźniak | Łukašenka | Kiebič | Šuškievič | Dubko | Novikaŭ | ||
| 1 | Iŭjeŭski rajon | 40.0% | 26.7% | 9.0% | 7.9% | 8.0% | 2.0% |
| 2 | Smarhoń | 38.0% | 16.0% | 18.0% | 16.0% | 4.5% | 2.0% |
| 3 | Smarhonski rajon | 34.0% | 20.6% | 13.0% | 9.0% | 15.6% | 1.9% |
| 4 | Maładziečna | 32.3% | 25.3% | 4.1% | 14.6% | 3.9% | 4.5% |
| 5 | Lida | 31.8% | 24.9% | 15.0% | 15.0% | 4.0% | 3.0% |
| 6 | Vilejka | 31.6% | 31.3% | 11.3% | 12.9% | 3.4% | 4.6% |
| 7 | Astraviecki rajon | 27.0% | 15.0% | 21.0% | 9.0% | 18.0% | 1.9% |
| 8 | Brasłaŭski rajon | 26.0% | 25.7% | 12.9% | 6.7% | 19.6% | 3.3% |
Pieraličym jašče niekalki rajonaŭ, dzie za Paźniaka prahałasavała sapraŭdy šmat vybarcaŭ, choć hetaha i nie chapiła dla pieramohi. Heta Stolinski rajon (31,8%), Hłybocki rajon (27,9%),Vaŭkavysk (27,6%) i Miadzielski rajon (26,9%).
Što da bujnych haradoŭ, to ŭ Salihorsku ŭ Paźniaka było 24%, u Minsku — 20,9%, u Žodzinie — 19,1%, u Hrodna — 17%.
U vyniku Paźniak zaniaŭ treciaje miesca z 12,8% hałasoŭ. Jon sastupiŭ Viačasłavu Kiebiču (17,33%) i Alaksandru Łukašenku (44,82%), jakija i trapili ŭ druhi tur. Što adbyłosia dalej, možna bačyć i dahetul.
Ciapier čytajuć
Stała viadoma, što za 200 tysiač jeŭra prapanoŭvali Siarhieju Cichanoŭskamu «biełaruskija biznesmieny»6
Kamientary
Prychod nacyjanalnaha lidara i tady i sieńnia prosta nievierahodny dla Biełarusi