Hamialčanka paskardziłasia na kalehu, jakaja na balničnym chadziła ŭ kafe i na šopinh. Akazałasia, heta nie zabaroniena
Žycharku abłasnoha centra źbiantežyła aktyŭnaje žyćcio kalehi ŭ instahramie.
Žycharka Homiela paskardziłasia na kalehu, jakaja na balničnym aktyŭna pościła ŭ sacsietkach fota z kaviarniaŭ i kramaŭ. Hamialčanka padzialiłasia dušeŭnym bolem z partałam «Biełka».
«Kaleha aficyjna znachodzicca na balničnym pa pryčynie prastudy. Ale ŭ hety čas vystaŭlaje ŭ siabie ŭ sacyjalnych sietkach fota, dzie jana adpačyvaje ŭ kafe. A niadaŭna jaje bačyli ŭ supiermarkiecie na šopinhu. Takija pavodziny aburajuć nie tolki mianie, ale i ŭvieś naš adździeł. Chvaroba jaje nie mocna turbuje. Ci možna pryciahnuć niadobrasumlennuju «chvoruju» da adkaznaści za parušeńnie balničnaha režymu?» — zadałasia pytańniem žycharka abłasnoha centra.
Jak akazałasia, ničoha kryminalnaha ŭ takich pavodzinach jaje kalehi niama. Hałoŭnaja doktarka Homielskaj palikliniki № 9 Hanna Jermałajeva patłumačyła, što vinavacić parušeńnie balničnaha režymu za naviedvańnie kaviarni miedyki nie majuć prava.
Pa instrukcyi, parušeńniem budzie ličycca niajaŭka na płanavy vizit da doktara, a taksama vyjezd za miažu padčas balničnaha. Pa słovach Jermałajevaj, jość vypadki, kali pacyjenty ź pierałomami ŭmudrajucca na balničnym jeździć u ciopłyja krainy.
Naviedvańnie kafe, restaranaŭ i handlovych centraŭ u Biełarusi na balničnym nie zabaroniena. Pry hetym doktar ličyć takija pavodziny niapravilnymi z maralnaha punktu hledžańnia, bo chvory, naprykład, VRVI, moža zaražać inšych.
Kamientary
Sačy za soboj! A lepš, za mužam. Ad takich jak ty i hulajuć!)