Padčas niadaŭniaha vizitu ŭ Hrodna Alaksandr Łukašenka zajaviŭ, što daktary ŭ Biełarusi zarablajuć da dziesiaci tysiač rubloŭ i paraŭnaŭ ich zarobak z prezidenckim. A ministr achovy zdaroŭja ahučyŭ, što siaredni zarobak u halinie składaje 2800 rubloŭ. «Naša Niva» pahutaryła ź miedykami pra toje, kolki jany atrymlivajuć nasamreč.
Vuzkija śpiecyjalisty zarablajuć mienš
Apytanyja nami miedyki nazyvajuć nastupnyja ličby. Doktar ahulnaj praktyki (byłyja terapieŭty) u paliklinicy atrymlivaje kala 2000 rubloŭ na ruki, kali pracuje na poŭnuju staŭku.
Kali brać 1,5 staŭki, to vychodzić u rajonie 2800 rubloŭ. Doktar ź vialikim stažam, jaki pracuje na paŭtary staŭki i biare dziažurstvy, razam z premijaj moža zarabić i 3 tysiačy.
Kudy mienš zarablajuć miedsiostry. Na staŭku maładyja śpiecyjalisty atrymlivajuć kala 800-900 rubloŭ na ruki. Miedsiastra, jakaja pracuje ŭ kabiniecie fizijaterapii, zarablaje 1200 rubloŭ, pakolki atrymlivaje kampiensacyju za škodnyja ŭmovy pracy.
Vuzkija śpiecyjalisty ŭ paliklinikach atrymlivajuć krychu mienš, čym daktary ahulnaj praktyki — kala 1800-1900 rubloŭ «čystymi», kali pracavać na adnu staŭku.
Zarobki pa 4-5 tysiač rubloŭ majuć zahadčyki adździaleńniaŭ, hałoŭnyja daktary abo daśviedčanyja chirurhi, jakija šmat pracujuć i biaruć dadatkovyja dziažurstvy.
Zredku sustrakajucca i bolš vysokija zarpłaty. Naprykład, miedycynski centr «Łade» šukaje hałoŭnaha doktara, jaki budzie zahadvać miedcentram. Takomu śpiecyjalistu pryvatnaja miedustanova hatovaja płacić ad 6 tysiač rubloŭ na ruki.
«Zarobki sapraŭdy vyraśli»
Jak rastłumačyŭ «Našaj Nivie» adzin ź miedykaŭ, zarobki daktaroŭ u Biełarusi apošnim časam sapraŭdy pavialičylisia. Śpiecyjalist źviazvaje heta z dvuma faktarami:
«Pa-pieršaje ŭ nas isnuje adčuvalny niedachop kadraŭ, pakolki za apošnija niekalki hadoŭ šmat daktaroŭ źjechali za miažu. Tamu vyhladaje, što Ministerstva achovy zdaroŭja sapraŭdy namahajecca trymać zarobki na bolš-mienš hodnym uzroŭni, kab mienš lekaraŭ zadumvałasia pra adjezd za miažu.
Ciapier, kali doktar moža zarablać pad 1000 dalaraŭ u Biełarusi, to achvotnych źjechać z ekanamičnych mierkavańniaŭ stanovicca mienš», — tłumačyć surazmoŭca.
Pry hetym śpiecyjalist adznačaje, što na niedachop kadraŭ u peŭnaj stupieni paŭpłyvali i palityčnyja represii.
«Z ekanamičnych mierkavańniaŭ źjazdžali ŭ asnoŭnym maładyja śpiecyjalisty, nie starejšyja za 40 hadoŭ. Ale paśla 2020 hoda rabotu zhubili i śpiecyjalisty ź vialikim stažam, bo ŭ takich vypadkach (kali zaŭvažany ŭ pratesnaj dziejnaści. — NN) nichto nie hladzić na ŭzrost, pasadu, kvalifikacyju i dośvied pracy».
Dziakuj pandemii?
Inšy čyńnik, jaki na dumku doktara paŭpłyvaŭ na rost zarobkaŭ u miedykaŭ, — kavidnyja nadbaŭki, jakija vypłačvali kala dvuch hadoŭ.
«Navat u tych, chto nie pracavaŭ niepasredna ŭ «čyrvonych zonach», byli peŭnyja dapłaty, bo tyja ž terapieŭty mieli šmat kantaktaŭ z chvorymi na kavid, tamu ŭ ich taksama ŭ toj čas byli vielmi hodnyja pa biełaruskich mierkach zarobki.
Vyhladaje, što ŭłady zrazumieli, što mohuć dazvolić sabie płacić bolš, tamu i pašli na taki krok. U vyniku pavyšeńnie zarobkaŭ paśla admieny kavidnych nadbavak dapamahło nivieliravać roźnicu ŭ zarpłatach.
Lekary padčas pandemii ŭžo pryzvyčailisia narmalna zarablać, tamu viartańnie na papiaredni ŭzrovień vyklikała b vialikuju niezadavolenaść», — miarkuje surazmoŭca.
Pry hetym, pa jaho słovach, razam z pavyšeńniem zarobkaŭ padrasła i nahruzka. Ad miedykaŭ pačali patrabavać bolš, značna pačaścilisia roznaha rodu pravierki.
Jašče adna mahčymaść zarablać hodna — brać dadatkovyja hadziny pryjomu ŭ pryvatnych miedycynskich centrach. Mnohija zapatrabavanyja śpiecyjalisty tak i robiać. Pracujuć na 0,5 staŭki ŭ dziaržaŭnaj ustanovie i dabirajuć nahruzku ŭ pryvatnych, bo hadzina pracy tam apłačvajecca lepiej.
Čytajcie taksama:
«Da 10 tysiač rubloŭ. Prezidencki zarobak». Łukašenka raskazaŭ, kolki zarablajuć miedyki
«Kraina hublaje ludziej z vysokimi dachodami». Što adbyvajecca ŭ biełaruskaj ajcišcy
Ciapier čytajuć
Vypusknica z Baranavičaŭ nabrała 400 bałaŭ z 400 mahčymych dla pastupleńnia1
Kamientary