Pavietrany ŭdar pa Siryi: kala Alepa zahinuli kala 40 čałaviek. Damask abvinavačvaje Izrail
Udar byŭ nakiravany suprać składa zbroi, jaki naležyć livanskaj vajenizavanaj hrupoŭcy «Chiezbała».
Pavodle źviestak, jakija pastupajuć ź Siryi, u vyniku pavietranaha ŭdaru kala horada Alepa zahinuli prynamsi 42 čałavieki. Siryjskaje Ministerstva abarony zajaviła, što terytoryju krainy abstralali samaloty vajskova-pavietranych sił Izraila, piša Bi-bi-si.
Pavodle źviestak Siryjskaha centra manitorynhu za vykanańniem pravoŭ čałavieka (niezaležnaja pravaabarončaja hrupa, jakaja mieścicca ŭ Łondanie), udar byŭ nakiravany suprać składa zbroi, jaki naležyć livanskaj vajenizavanaj hrupoŭcy «Chiezbała». Arhanizacyja zajaviła, što siarod zahinułych byli, pa jaje vyrazie, «vajskoŭcy režymu».
Izrailskaja armija zajaviła Bi-bi-si, što nie kamientuje dadzienyja ab udary pa Siryi. Pradstaŭniki ŭładaŭ Izraila, jak praviła, nie dajuć kamientaroŭ ab dziejańniach izrailskich vajskoŭcaŭ za miežami krainy.
Siryjski centr manitorynhu za vykanańniem pravoŭ čałavieka śćviardžaje, što ŭ vyniku ciapierašniaha ŭdaru była zabitaja najbolšaja kolkaść siryjskich vajskoŭcaŭ u paraŭnańni z usimi padobnymi abstrełami, jak miarkujecca ažyćcioŭlenymi Izrailem.
Pavodle źviestak prajekta, mnostva ludziej atrymali ranieńni, u tym liku ciažkija. Centr śćviardžaje, što byŭ źniščany skład zbroi ŭ rajonie Džabryn kala mižnarodnaha aeraporta Alepa, a taksama abjekt siryjskich sił SPA, raźmieščany prykładna za 20 km ad horada. Vybuchi taksama byli čutnyja ŭ adnym z zachodnich rajonaŭ Alepa.
Reuters pieradaje sa spasyłkaj na dźvie krynicy ŭ siłach biaśpieki, što siarod zahinułych było prynamsi piaciora čalcoŭ «Chiezbały». Pavodle źviestak hetaha ahienctva, u vyniku ŭdaru byli zabityja 38 čałaviek.
Siryjskaje Ministerstva abarony śćviardžaje, što siarod zahinułych — mirnyja žychary i vajskoŭcy ŭzbrojenych sił Siryi. Pavodle zajavy viedamstva, pavietranyja ŭdary byli naniesienyja kala Alepa adnačasova z napadami bieśpiłotnikaŭ, ažyćcioŭlenymi niejkimi »terarystyčnymi arhanizacyjami».
Za apošnija hady Izrail ažyćciaviŭ sotni pavietranych udaraŭ pa Siryi, źniščajučy abjekty «Chiezbały» i inšych struktur, źviazanych ź Iranam.
Izrailskija ŭłady sprabujuć praduchilić umacavańnie vajskovaj siły «Chiezbały» na terytoryi Siryi i pieraškadžajuć Iranu pieradavać hrupoŭcy sučasnuju zbroju.
Iran i »Chiezbała», blizkimi sajuźnikami jakich Źjaŭlajecca Siryja, ličać svajoj metaj spynieńnie isnavańnia dziaržavy Izrail.
Jany taksama padtrymlivajuć palestynskuju hrupoŭku CHAMAS, jakaja 7 kastryčnika 2023 hoda napała na Izrail, što spravakavała vajnu ŭ siektary Haza.
Kamientary