ZŠA nanieśli pieršyja ŭdary pa abjektach Irana ŭ Iraku i Siryi. Abiacajuć praciahnuć
U avijaŭdarach było vykarystana bolš za 125 vysokadakładnych bojeprypasaŭ.
Amierykanskaja avijacyja pačała nanosić udary pa abjektach prairanskich farmavańniaŭ u Iraku i Siryi ŭ adkaz na ŭdar bieśpiłotnika pa bazie ŭ Iardanii 28 studzienia, jaki zabraŭ žyćci troch amierykanskich vajskoŭcaŭ, piša Bi-bi-si.
Pavodle aficyjnaj zajavy, u 16:00 EST (00:00 pa Minsku), 2 lutaha siły Centralnaha kamandavańnia ZŠA (CENTCOM) nanieśli avijaŭdary ŭ Iraku i Siryi pa iranskim Korpusie vartavych isłamskaj revalucyi (KVIR) i źviazanych ź im uzbrojenym farmavańniam.
Vajennyja siły ZŠA nanieśli ŭdar pa bolš čym 85 celach, pry hetym šmatlikija samaloty, u tym liku bambardziroŭščyki dalokaha dziejańnia, prylacieli sa Złučanych Štataŭ.
U avijaŭdarach było vykarystana bolš za 125 vysokadakładnych bojeprypasaŭ. Abjekty, jakija zaznali ŭdary, uklučali ŭ siabie centry kamandavańnia i kiravańnia, raźviedvalnyja centry, rakiety, a taksama schoviščy bieśpiłotnych latalnych aparataŭ i abjekty łahistyki i łancužkoŭ pastavak bojeprypasaŭ bajevikoŭ i ich sponsaraŭ z KVIR, jakija spryjali napadam na siły ZŠA i kaalicyi, skazana ŭ zajavie.
Praz karotki čas na sajcie Biełaha doma źjaviłasia zajava prezidenta Džo Bajdena: «Naš adkaz pačaŭsia siońnia. Jon praciahniecca ŭ taki čas i ŭ takim miescy, jakoje my abiarom sami. Złučanyja Štaty nie šukajuć kanfliktu na Blizkim Uschodzie ci dzie-niebudź jašče ŭ śviecie. Ale ŭsie, chto žadaje nam naškodzić, chaj viedajuć: kali vy pryčynicie škodu amierykancu, my adkažam».
Śledam z zajavaj vystupiŭ i ministr abarony ZŠA Łojd Ościn, paviedamiŭšy, što prezident Bajden zahadaŭ pryniać miery, kab «pryciahnuć da adkaznaści KVIR i źviazanych ź im bajevikoŭ za napady na ZŠA i kaalicyjnyja siły».
«My nie pacierpim napadaŭ na amierykanskija vojski. My zrobim usie nieabchodnyja dziejańni dla abarony Złučanych Štataŭ, našych sił i našych intaresaŭ», — skazaŭ na zakančeńnie jon.
U čaćvier ahienctva Reuters sa spasyłkaj na nienazvanyja krynicy paviedamiła, što aficery KVIR vysokaha ranhu, jakija znachodzilisia ŭ Siryi, pakinuli krainu ź dziasiatkami aficeraŭ siaredniaha źviana.
Ni Iran, ni ZŠA nie chočuć ustupać u poŭnamaštabnuju vajnu, i abiedźvie krainy zajavili pra heta.
Pavodle paviedamleńnia CNN u čaćvier, aficyjnyja asoby ZŠA kažuć, što jość prykmiety taho, što iranski ŭrad stanovicca ŭsio bolš zaniepakojenym dziejańniami svaich proksi ŭ rehijonie, jakija z kastryčnika ździejśnili bolš za 160 napadaŭ na amierykanskija vojski.
Ale Iran zajaviŭ, što budzie rašuča reahavać na luby napad na jaho terytoryju, jaho intaresy abo iranskich hramadzian za miežami krainy.
Napiaredadni krynicy amierykanskich ŚMI raspaviali, što płan udaraŭ u adkaz pa terytoryi Iraka i Siryi zaćvierdžany prezidentam Džo Bajdenam i budzie ŭviedzieny ŭ dziejańnie ŭ najbolš prydatny (pieravažna z punktu hledžańnia ŭmoŭ nadvorja) momant.
U vyniku ataki bieśpiłotnika ŭ Iardanii zahinuli troje amierykanskich vajskoŭcaŭ i bolš za 40 paciarpieli.
Ciapier čytajuć
Na aŭtašou ŭ Lidzie ledź nie zahinuŭ adzin z samych znakamitych kaskadzioraŭ Biełarusi — jaho videa sabrali amal paŭmiljarda prahladaŭ. Što ź im ciapier?88
Kamientary