Na polskim kirunku čarhovy antyrekord z čerhami z aŭtobusaŭ. Kolki času ciapier zajmaje prajezd praź miažu

Litva

Ludzi, jakija ŭ piatnicu jechali na aŭto ź Biełarusi ŭ Litvu praz punkt propusku «Bieniakoni», kažuć, što na prajezd praź miažu ŭ ich syšło 18 hadzin.

Padarožniki, jakija stali ŭ čarhu na vyjezd u niadzielu kala 10 ranicy, u Litvu trapili tolki ŭ paniadziełak nočču. Uvieś praces zaniaŭ kala 17 hadzin.

Aŭtobusy ŭ «Bieniakoniach» zvyčajna prachodziać miažu značna chutčej: ad 1,5 da 4 hadzin.

Učora dniom u «Kamiennym Łozie» aŭtobusy prachodzili praź miažu za 4-5 hadzin.

Časam, u budnyja dni, praskočyć praź biełaruska-litoŭskuju miažu na aŭto možna ciaham niekalkich hadzin.

Polšča

Situacyja na biełaruska-polskaj miažy vyhladaje bolš napružana. Bližej da viečara ŭ čarzie na vyjezd ź Biełarusi sabrałasia bolš za 50 aŭtobusaŭ. Na piku ŭ čarzie było 68 aŭtobusaŭ. Raniej rekordnymi ličbami ličylisia bolš za 30-40 aŭtobusaŭ. Pry hetym, da apošniaha zakryćcia Litvoj jašče dvuch punktaŭ propusku na miažy ź Biełaruśsiu čerhi z aŭtobusaŭ byli davoli redkaj źjavaj i zvyčajna nie nabirałasia bolš za 10 aŭtobusaŭ.

Pavialičyć

Apošnija dva dni ŭ čarzie na vyjezd ź Biełarusi ŭ Polšču stabilna znachodzicca kala 40-60 aŭtobusaŭ.

Praz heta mocna pavialičyŭsia čas prajezdu praź miažu. Pasažyry, jakija jechali ŭ minułuju piatnicu ź Minska ŭ Varšavu, patrapili ŭ Polšču tolki praz 42 hadziny paśla pryjezdu ŭ punkt propusku.

Z ulikam vielizarnaj čarhi ludziam raili źniać u Breście kvateru na sutki, kab nie siadzieć uvieś čas u aŭtobusie, i viarnucca na miažu pa miery nabližeńnia da terminała.

Inšym padarožnikam, jakija jechali ŭ Polšču ŭ subotu, pašancavała bolš. Pieravozčyk prasoŭvaŭ pa čarzie inšy aŭtobus, jaki sastupiŭ miesca aŭtobusu z pasažyrami. Dziakujučy takim manipulacyjam, prajechać praź miažu ŭdałosia za 16 hadzin. 

Dla taho, kab nie stajać sutkami ŭ čarzie, niekatoryja šukajuć volnyja miescy ŭ aŭtobusach, jakija stajać bližej da miažy, i tam kuplajuć kvitki. Ale pašancavać moža nie zaŭždy, da taho ž heta pasuje tolki bieraściejcam.

Čamu značna vyraśli čerhi z aŭtobusaŭ?

Heta tłumačycca tym, što častka rejsaŭ, jakija nakiroŭvalisia ź Biełarusi ŭ Polšču praź Litvu, ciapier vykonvajucca praz Polšču. Hetamu paspryjali jak zakryćcio jašče dvuch punktaŭ propusku na miažy ź Litvoj, tak i skaračeńnie kolkaści dazvołaŭ na pieravozku praz terytoryju Litvy.

Što tyčycca prajezdu na aŭto ŭ punkt propusku «Brest», to apošnim časam ličycca, što ŭ siarednim na pierasiačeńnie miažy ŭ adzin bok sychodziać plus-minus sutki.

Łatvijski kirunak tradycyjna zastajecca najmienš zahružanym, ale i tam apošnim časam čaściakom źbirajucca čerhi, choć i nie takija vialikija, jak u Polšču i Litvu.

Pa stanie na 16 hadzin 25 sakavika, na vyjezd ź Biełarusi ŭ Łatviju sabrałasia kala 35 lehkavikoŭ.

Na litoŭskim kirunku situacyja vyhladaje tak: 60 lehkavikoŭ čakaje vyjezdu ŭ «Kamiennym Łozie», i 90 u «Bieniakoniach». 

U «Breście» sabrałasia bolš za 260 aŭto na vyjezd ź Biełarusi. 

Što z hruzavikami?

Praciahvajuć raści čerhi i na hruzavym kirunku. Najbolš zahružanyja PP na miažy ź Litvoj. U kožnym ź ich vyjezdu čakaje kala 1150 vielikahruzaŭ. Na miažy z Łatvijaj — kala 800, z Polščaj — kala 500. Hruzapieravozčyki ŭžo adreahavali na ŭzrosšyja čerhi pavieličeńniem stavak. Padrabiaźniej pra heta možna pračytać pa spasyłcy.

Čytajcie taksama:

«Supravodziać da pašpartnaha kantrolu». Kolki kaštuje miesca ŭ čarzie na miažy z Polščaj

«Fatahrafavali ekran, kali łazili pa sacsietkach». Pasažyr raskazaŭ, jak prachodziła pravierka na biełaruska-polskaj miažy

• 14
• 0
• 7
• 7
• 2
• 10
• 28
• 0