«Na biełaruskim froncie pieramahaje Pucin». U Vilni na Kanfierencyi Kalinoŭskaha abmiarkoŭvajuć, jak być Biełarusi
U litoŭskim Siejmie prachodzić dvuchdzionnaja Kanfierencyja Kalinoŭskaha.
Śviatłana Cichanoŭskaja vystupiła na adkryćci kanfierencyi. Jana zaklikała zachoŭvać pytańnie Biełarusi na paradku dnia. Taksama Cichanoŭskaja padkreśliła važnaść dapamohi Ukrainie i adznačyła: Biełaruś — samaje słaboje źviano pucinskaj vajskovaj mašyny.
«Siońnia ŭ našym rehijonie znoŭ vyrašajecca los svabody, demakratyi i prava narodaŭ na samavyznačeńnie. Jon vyrašajecca na frantach Ukrainy. Jon taksama vyrašajecca ŭ Biełarusi, u Małdovie. I znoŭ my supraćstaim toj ža samaj impieryi», — pramaŭlała Cichanoŭskaja.
«Impieryja sprabuje źniščyć nie tolki prava našaha naroda na niezaležnaje žyćcio, ale i samu jaho identyčnaść — movu, kulturu, histaryčnuju pamiać, jeŭrapiejskija kaštoŭnaści. Rasijanie robiać heta dla taho, kab ablehčyć i apraŭdać dalejšuju ahresiju».
Z pasłańniem vystupiŭ taksama kamandzir pałka Kalinoŭskaha Dzianis «Kit» Procharaŭ.
«Siońnia biełarusy pralivajuć kroŭ za Ukrainu, bo tolki pieramoha Ukrainy daść šaniec na vyzvaleńnie Biełarusi i zaścieraže krainy Jeŭropy ad rasijskaj ahresii ŭ najbližejšaj budučyni», — adznačyŭ jon.
Padčas adnoj z dyskusij vystupiŭ palityk Anatol Labiedźka. Jon zaŭvažyŭ, što ŭ Pucina jość stratehija pa Biełarusi — zachapić jaje, u toj čas, kali ŭ Vašynhtona i Brusela kankretnaj stratehii pa našaj krainie niama.
«A heta aznačaje, što my pavinny kanstatavać: na biełaruskim froncie pieramahaje Pucin. Pucin maje nie tolki ščylnuju supracu sa svaim ideałahičnym bratam Alaksandram Łukašenkam — Pucin adkryŭ dźviery navučalnych ustanoŭ dla maładych biełarusaŭ, Pucin zrabiŭ maksimalna libieralnym pravavoje stanovišča biełarusaŭ u Rasii. Ci majem my takija kroki z boku našych siabroŭ z Zachadu? Pytańnie rytaryčnaje», — razvažaŭ jon.
Labiedźka vykazaŭsia, što stratehičny dyjałoh z Vašynhtonam i Bruselem treba napaŭniać kankretnymi dziejańniami, zafiksavać pierśpiektyvu intehracyi Biełarusi ŭ ES.
«Niedapuščalna skaračeńnie padtrymki maśmiedyja ŭ situacyi, kali idzie infarmacyjnaja vajna, my sami stralajem sabie ŭ nahu», — dadaŭ Labiedźka.
Kiraŭnica departamienta MZS Hiermanii ŭ spravach RF i Biełarusi Monika Lenchard zaŭvažyła, što ES pavinien spryjać tamu, kab biełarusy mahli jeździć pa śviecie.
«Tyja ludzi, jakija vystupajuć suprać režymu, suprać ahresiŭnaj vajny Rasii — kab jany mahli padtrymlivać suviaź. Heta prostyja hramadzianie, jakija nie majuć ničoha ahulnaha z režymam. Heta aznačaje, što pajezdki pamiž Biełaruśsiu i Jeŭrasajuzam pavinny być mahčymy».
Namieśnik staršyni Kamiteta zamiežnych spraŭ litoŭskaha Siejmu Hiedrus Surplis adznačyŭ, što treba i dalej padtrymlivać biełaruskija demakratyčnyja siły.
Jon taksama zaŭvažyŭ, što biełarusy štohod pa 3 młn razoŭ pierasiakajuć miažu ź Litvoj.
«U častki nasielnictva Litvy hety vyklikaje napružańnie», — adznačyŭ jon. I dadaŭ, što jany sutykajucca z vyklikami dla nacyjanalnaj biaśpieki. «Treba akazvać padtrymku krainam-členam ES, u jakich zasiarodžany biełaruskija demakratyčnyja siły», — kazaŭ jon.
Tranślacyja kanfierencyi dastupna anłajn.
Kanfierencyja Kalinoŭskaha — heta štohadovy kruhły stoł viadomych suśvietnych lidaraŭ i ekśpiertaŭ pra budučyniu Biełarusi jak častku jeŭrapiejskaj siamji. Upieršyniu prajšoŭ u Vilni 24 žniŭnia 2020 hoda.
Ciapier čytajuć
«Ty ŭ nas u Biełarusi!» — «Ja mamu tvaju ja*aŭ». Hościu z Ałtaja nie spadabałasia zaŭvaha za kinuty ŭ centry Minska niedakurak30
Kamientary