Z Muzyčnaha teatra, dzie dniami praśpiavali «Pieramien!», źbirajucca zvolnić dyrektara
Na minułym tydni rasijski arkiestr u Muzyčnym teatry ŭ Minsku syhraŭ kampazicyju «Pieramien!» hurta «Kino», jakoj padpiavała ŭsia zała. Vyhladaje, što za heta moža stracić pasadu dyrektar teatra Siarhiej Pukita, daviedałasia «Lusterka».
Zhodna z afišaj Muzyčnaha teatra, 16 sakavika tam vystupaŭ simfaničny arkiestr Varoniežskaha kancertnaj zały z prahramaj «Antałohija ruskaha roku», u repiertuary jakoha jak raz jość hetaja kampazicyja hurta «Kino».
Ale toje, što adbyłosia, nie spadabałasia čynoŭnikam, bo ŭ 2020 hodzie heta pieśnia Viktara Coja stała adnym ź nieaficyjnych simvałaŭ padziej žniŭnia, kali hukarežysiory («dydžei pieramienaŭ») Kirył Hałanaŭ i Uład Sakałoŭski ŭklučyli jaje 6 žniŭnia la Kijeŭskaha skviera ŭ Minsku (tam płanavaŭsia mitynh u padtrymku Cichanoŭskaj, jaki ŭłady admianili), paśla čaho byli aryštavanyja. Chłopcy paźniej źjechali ŭ Litvu.
Ciapier za hetaje «kramolnaje» vykanańnie chočuć zvolnić dyrektara teatra Siarhieja Pukitu. Pavodle infarmacyi krynicy «Lusterka», zaŭtra, 21 sakavika, u jaho apošni pracoŭny dzień.
Rabotniki teatra źbirajucca pisać kalektyŭny zvarot z prośbaj pakinuć ciapierašniaha kiraŭnika na pasadzie, jany «ŭ cełym charaktaryzujuć jaho jak razumnaha, sumlennaha čałavieka».
Žurnalistcy «Lusterka» ŭ pryjomnaj dyrektara adkazali, što Pukita na miescy, ale zaniaty, a pytańnie, ci sapraŭdy jaho źbirajucca zvalniać, kamientavać admovilisia. A voś va ŭpraŭleńni kultury Minharvykankama skazali bolš:
«My ŭ kursie hetaj prablemy. Kiraŭnictva horada vyrašaje, jak być u hetaj situacyi. Ciapier pakul jašče ničoha nie mahu skazać, ale tak, sapraŭdy, incydent byŭ. Jak jon vyrašycca, pakul nie mahu skazać, — ciapier idzie razhlad hetaha pytańnia. Nu, bačycie, adbyłosia tak, jak adbyłosia. Dziakuj Vam za vašy pieražyvańni», — adkazała supracoŭnica ŭpraŭleńnia i dadała, što nie viedaje, kali rašeńnie budzie pryniata.
Siarhiej Pukita ŭznačalvaje Muzyčny teatr z 2019 hoda. Jon naradziŭsia ŭ 1978-m, u 1998-m skončyŭ Mahiloŭskaje vučylišča kultury, u 2003-m — staličny Univiersitet kultury (majsternia Madesta Abramava). Z 2004 hoda pracavaŭ u staličnym Maładziožnym teatry (z 2010-ha byŭ namieśnikam dyrektara), a taksama aktyŭna zdymaŭsia ŭ kino, praŭda, čaściej za ŭsio ŭ epizodach, ale ŭ davoli viadomych filmach: «Stylahi», «Kamienskaja-5», «Dziaržaŭnaja miaža» i inšych.
Ciapier čytajuć
«Ty ŭ nas u Biełarusi!» — «Ja mamu tvaju ja*aŭ». Hościu z Ałtaja nie spadabałasia zaŭvaha za kinuty ŭ centry Minska niedakurak28
Kamientary
Zvalniajcie rasijski arkiestr, jaki hraŭ pieśniu.
Pradjaŭlajcie svaje pretenzii simfaničnamu arkiestru Varoniežskaj kancertnaj zały.