Kanadziec z pałka Kalinoŭskaha: «Svajoj rodnaj adzinkaj liču bataljon «Lićvin»
Svaju historyju dałučeńnia da pałka Kalinoŭskaha raskazaŭ kanadziec Devid Śmit.
U intervju «Biełsatu» Devid Śmit svajo rašeńnie nakiravacca va Ukrainu tłumačyć imknieńniem dapamahčy krainie, jakuju «sprabuje zavajavać adzin z najvialikšych dyktataraŭ».
Pa słovach mužčyny, da taho jak stać dobraachvotnikam, jon 15 hadoŭ prasłužyŭ u kanadskim vojsku aficeram piachoty. U časie słužby jaho nakiravali pracavać z ukraincami ŭ miežach mižnarodnaj supolnaj daradča-dapamožnaj misii, jakuju stvaryli ŭ pieršyja tydni vajny.
«Ja pracavaŭ z ukraincami raniej u Kanadzie. Kali ja apynuŭsia va Ukrainie, tam było šmat zamiežnych vajskoŭcaŭ. Niekatoryja z dośviedam słužby ŭ armijach krain NATA. Ale ja nie dumaju, što tady ŭsie jany razumieli surjoznaść i sutnaść hetaha kanfliktu, jak ja heta razumieŭ»,
— adznačaje Śmit. Jon dadaje, što panaziraŭ prykładna hod za raźvićciom padziej na froncie i tym, jak «mižnarodnaja supolnaść silicca zrazumieć, jaki maje być adkaz na ahresiju» — i vyrašyŭ, što viedaje, jak moža dapamahčy.
Mužčyna zhadvaje, što ŭ kancy 2022 hoda nienadoŭha viarnuŭsia dachaty, kab vykanać niekatoryja farmalnaści i skłaści rapart ab zvalnieńni z kanadskaha vojska. Dataj zvalnieńnia stała 31 sakavika 2023 hoda. A ŭžo ŭ noč na 15 krasavika jon pierasiek ukrainskuju miažu.
«Heta była vielikodnaja niadziela. Ja sustreŭsia z ukrainskaj siamjoj z Kijeva, ź jakoj mianie paznajomili kanadcy. My pajšli na vielikodnuju imšu. Adstajali piać hadzin usianočnaj u centry Kijeva. Na nastupny dzień ja spakavaŭ svaje rečy i pierasialiŭsia ŭ kvateru, jakuju zdymali zamiežnyja vałanciory. A ŭžo nastupny dzień staŭsia pieršym dniom majoj słužby. Ja pryjšoŭ u štab, kab padać rapart ab dałučeńni da ŭkrainskaha internacyjanalnaha lehijona», — zhadvaje mužčyna.
Kanadziec dałučyŭsia da bataljona «Lićvin», jaki ŭ toj čas vajavaŭ u vakolicach Bachmuta. Paźniej jon słužyŭ u bataljonie «Vołat» i ŭ inšych padraździaleńniach, jakija zajmajucca raźviedkaj i ahniavoj padtrymkaj. «Ale svajoj rodnaj adzinkaj ja liču bataljon «Lićvin», — padkreślivaje kanadziec.
Svajo dałučeńnie da pałka Kalinoŭskaha Śmit tłumačyć nastupnym čynam:
«Adzin znajomy ŭkrainiec skazaŭ, što biełarusy majuć dobra arhanizavany adździeł. <…> Tamu kali ja sustreŭsia ź ich kiraŭnictvam, to ŭžo viedaŭ, što chaču vajavać mienavita tam. My hladzim na rečy adnolkava. Ja nie musiŭ ničoha tłumačyć, dyj jany nie pytalisia, čamu ja chaču vajavać mienavita ź imi. Ja pryjšoŭ i skazaŭ, što chaču dapamahčy Ukrainie pieramahčy Pucina i chaču dapamahčy biełarusam viarnuć svaju krainu i pazbycca Łukašenki».
Mužčyna zhadvaje svoj pieršy dzień u pałku. «Ja pryjechaŭ na mašynie jašče z adnym čałaviekam tudy, dzie jany žyli. My sustrelisia na niejkuju hadzinu. Sprabavali prabicca praz moŭny barjer. Jany skazali, što na nastupny dzień źbirajucca na strelbišča, i spytali, ci ja pajedu ź imi. Ja pahadziŭsia. My pajechali. Pastralali razam. I na nastupny dzień užo jechali na brani BMP u napramku tranšejaŭ u vakolicach Klaščejeŭki, u jakich ja pravioŭ reštku viasny».
«Niama nieabchodnaści razmaŭlać na adnoj movie. U chutkim časie vy pačynajecie daviarać adzin adnamu, dumać adnolkava. Tamu pieršyja dni prajšli cudoŭna. Ja adčuvaŭ, što mianie adrazu pryniali. Nie stavilisia jak da čužoha», — adznačaje Śmit.
Paśla miaciažu Pryhožyna mužčyna staŭ vykonvać aficerskija abaviazki ŭ štabie pałka Kalinoŭskaha. A ŭ kancy leta jon razam z pałkom vajavaŭ u vakolicach Kupianska. Tam jon prabyŭ da svajho adjezdu na adpačynak.
Čytajcie jašče:
Błohier Jan Rudzik ustupiŭ u Połk Kalinoŭskaha
Połk Kalinoŭskaha naładziŭ ułasnuju vytvorčaść minamiotaŭ
Kamandzir Pałka Kalinoŭskaha raskazaŭ, kolki ŭ im ciapier ludziej
Kamientary