U Hrodzienskim harvykankamie raskazali, čamu źnieśli kazarmu XIX stahodździa
Va ŭpraŭleńni budaŭnictva, architektury i horadabudaŭnictva Hrodzienskaha harvykankama raskazali, čamu vyrašyli źnieści aŭtentyčnuju kazarmu XIX stahodździa na vulicy Ščorsa, chacia spačatku abiacali zachavać. Maŭlaŭ, na cokalnym paviersie budynka chacieli pabudavać haražy, ale akazałasia, što ścieny nie vytrymajuć, piša Hrodna Life.
Pieršapačatkova zabudoŭščyk raspracavaŭ prajekt z zachavańniem histaryčnaha budynka kazarmy na Ščorsa, 2. Prajekt praduhledžvaŭ rekanstrukcyju budynka pad šmatkvaterny žyły dom i ŭładkavańnie haražoŭ u cokalnym paviersie. Ale ŭžo na stadyi padrychtoŭčych rabot vyjavili nieadpaviednaść apornaj zdolnaści ścienaŭ budynka narmatyvam, patłumačyli ŭ harvykankamie dla «Hrodno Plus».
Toje, što cehła straciła svaje ŭłaścivaści, paćvierdziła atestavanaja na praviadzieńnie abśledavańniaŭ kampanija. Praz heta nielha było harantavać biaśpieku rekanstrujavanaha abjekta — i biez taho słabyja kanstrukcyi dadatkova nahružalisia.
Źniasuć i pabudujuć
Zabudoŭščyk AAT «Paleśsiežyłbud» prystupiŭ da realizacyi prajekta rekanstrukcyi byłoj kazarmy na Ščorsa, 2. Novaje prajektnaje rašeńnie praduhledžvaje častkovy demantaž nienaležnych apornych kanstrukcyj. Paśla hetaha źbirajucca ŭźvieści budynak z zachavańniem habarytaŭ i charaktaru architektury najaŭnaha budynka.
«Bolš taho, materyjały zachoŭvajucca ad razborki budynka, u pryvatnaści cehła, jaki projdzie dbajnuju pravierku pa marozaŭstojlivaści i apornaj zdolnaści, buduć prymianiacca ŭ azdableńni abjekta, jaki budujecca», — zajavili čynoŭniki.
Prajekt prajšoŭ usie ŭzhadnieńni, zapeŭnivajuć u harvykankamie. Jon byŭ raspracavany ŭ adpaviednaści z architekturna-płanirovačnym zadańniem i zadańniem na prajektavańnie, va ŭstanoŭlenym paradku byli projdzienyja ŭsie nieabchodnyja administracyjnyja pracedury. U tym liku abjekt dvojčy razhladaŭsia na architekturna-horadabudaŭničaj radzie horada. Było atrymana ŭzhadnieńnie haradskoha i abłasnoha kamiteta architektury i budaŭnictva i stanoŭčaje zaklučeńnie Dziaržbudekśpiertyzy pa Hrodzienskaj vobłaści.
Ci źniasuć takim samym čynam druhuju kazarmu kompleksu XIX stahodździa pa Ščorsa, 4, u harvykankamie nie ŭdakładnili.
Kamientary