Vieranika Capkała — pakupnikam jaje kanfiskavanaj kvatery: «My vierniemsia i zapatrabujem ad vas vypłaty arendy!»

«Jak mnie stała viadoma, naša kvatera ŭ Minsku, pa vulicy Čarnyšeŭskaha 5, jakaja naležyć na pravie ŭłasnaści mnie i majmu mužu była vystaŭlenaja na prodaž arhanizacyjaj Bielurazabieśpiačeńnia, jakaja śpiecyjalizujecca na prodažy niezakonna aryštavanaj majomaści. U tarhach paznačana, što hetaja majomaść naležyć Capkału Valeryju Viljamaviču.

Nasamreč kvatera była nabyta nami ŭ sumiesnym šlubie i nie moža ličycca vyklučna ŭłasnaściu majho muža.

Akramia nas, na kvateru taksama majuć majomasnyja pravy i dvoje našych niepaŭnaletnich dziaciej. Majomaść źjaŭlajecca adzinaj majomaściu, jakoj my vałodajem na pravie ŭłasnaści i jakaja źjaŭlajecca pastajannym miescam pražyvańnia našych niepaŭnaletnich dziaciej.

Zhodna z artykułam 74 «Kodeksa Respubliki Biełaruś ab šlubie i Siamji» dzieci nie mohuć być vysielenyja «ŭ nikudy», inšymi słovami, być vyhnanymi na vulicu.

Pazbaŭleńnie niepaŭnaletnich dziaciej adzinaha miesca pražyvańnia nie tolki hruba parušaje ich pravy, ustanoŭlenyja Žyllovym kodeksam Respubliki Biełaruś, u adpaviednaści ź jakim niemahčyma vyhnać na vulicu maci ź niepaŭnaletnimi dziećmi z adzinaj kvatery, a taksama źjaŭlajecca parušeńniem pravoŭ maci i dziciaci, jakoje achoŭvajecca Kanstytucyjaj i šmatlikimi zakanadaŭčymi aktami Respubliki Biełaruś.

Pavialičyć

Supraćzakonnaje rašeńnie biełaruskaha suda pazbaŭlaje mianie mahčymaści vykonvać baćkoŭskija abaviazki ŭ poŭnym abjomie, a maich dziaciej, hramadzian Respubliki Biełaruś, prava znachodzicca ŭ hetaj kvatery, atrymlivać miedycynskuju dapamohu i adukacyju.

U adpaviednaści z Zakonam Respubliki Biełaruś ad 19.11.1993» ab pravach dziciaci», najvažniejšaj zadačaj dziaržavy źjaŭlajecca ŭsiebakovaja harantavanaja abarona dziaržavaj i hramadstvam dziacinstva, siamji i maciarynstva ciapierašniaha i budučych pakaleńniaŭ.

Ja źviartajusia ŭ Śledčy kamitet i Prakuraturu Respubliki Biełaruś z patrabavańniem pravieści rasśledavańnie na pradmiet razhromu našaj kvatery, a taksama pakražy asabistaj majomaści i majomaści maich dziaciej z našaj kvatery.

Ja źviartajusia da ludziej, jakija zachočuć nabyć našu kvateru pa zanižanym košcie z metaj «sarvać chalavu».

Vy pavinny razumieć, što my abaviazkova vierniemsia dadomu, razam ź dziećmi zajedziem u kvateru, pabudavanuju na zakonna zaroblenyja srodki i zapatrabujem ad vas vypłaty arendnych płaciažoŭ za ŭvieś pieryjad karystańnia našaj majomaściu!», — padsumoŭvaje Vieranika Capkała.

Nahadajem, što ŭ červieni 2022 hoda siłaviki razhramili katedž Capkałaŭ niepadalok ad Nacyjanalnaj biblijateki.

• 59
• 0
• 16
• 8
• 3
• 10
• 21
• 0