Majtki ź dziaržaŭnym hierbam? Što źviazanaje ź Biełaruśsiu pradajuć u suśvietnych internet-kramach
Na suśvietnych anłajn-markietpłejsach nakštałt Amazon, Aliexpress i navat kitajskaha Temu jość tavary, źviazanyja ź Biełaruśsiu, i časam vielmi niečakanyja. Pahladzieli, što tam možna znajści.
Na Aliexpress jość cełaja sieryja cišotak z nazvaj papularnaha biełaruskaha hurta Molchat Doma. Na ich niezvyčajnyja prynty — vyjavy budynkaŭ ź niepraŭdapadobnaj architekturaj, a na adnoj ź cišotak jašče i tajamničy nadpis: «Jak mašyna pryciskaje ludziej, pieratvarajučy ich u raboŭ».
Majki kaštujuć ad 4,45 dalara. U niekatorych madelaŭ rejtynh tolki 3 ci 4 bała z 5, tak što varta čytać vodhuki pierad tym, jak zamaŭlać sabie cišotku.
Vielmi niečakanaja prapanova na Amazon — žanočyja majtki z vyjavaj dziaržaŭnaha hierba Biełarusi ŭ centry. Vytvorcy raschvalvajuć svoj tavar jak mohuć: nazyvajuć majtki seksualnymi i stylnymi, a taksama raskazvajuć, što cuda-bializna vizualna vyciahvaje cieła, što dapamahaje vyhladać bolš zhrabna.
I heta nie ŭsio — materyjał majtkoŭ, piša vytvorca, miakki i prapuskaje pavietra, ich možna nasić ceły dzień i adčuvać kamfort. Takaja madel padydzie pad lubyja štany, ich možna nasić u roznaje nadvorje i pad adzieńnie luboha stylu. Košt takoj bializny 17,99 dalara.
Kitajski anłajn-hihant Temu prapanuje niekalki tavaraŭ z nadpisam I love my Belarusian girl. Heta chudzi za 11,97 jeŭra, chatnija šorty za 9,71 jeŭra i chatnija štany za 10,19 jeŭra — usie madeli raźličanyja na mužčyn.
Vodhukaŭ na hetyja tavary pakul niama, što vyhladaje trochi padazronym. Ale ŭ pastaŭščyka hetaha adzieńnia dobry rejtynh — 4,8 bała z 5.
Biez prablem možna nabyć u siecivie biełaruskija ściahi. Kali ŭziać dziaržaŭny ściah, cana na takoje pałotnišča pamieram 90 na 150 sm ciapier pačynajecca ad 0,99 dalara. A voś za nacyjanalny ściah na tym ža Aliexpress daviadziecca zapłacić bolej — rychtujcie ad 1,98 dalara. Voś tolki niezrazumieła, čamu vytvorca ŭklučaje ŭ apisańnie biełaruskaha ściaha słovy «fiederalny subjekt Rasii».
Pradajuć i płašč-daždžavik u čyrvona-zialonych kolerach za 9,98 dalara. Ale, zdajecca, biełaruskija siłaviki całkam mohuć za taki ŭbor abvinavacić u ździeku sa ściaha. Dy i płašč vyhladaje nie nadta zručnym, nie kažučy pra styl.
Jašče vy znojdziecie na Aliexpress bahata cikavych cišotak z pryntami na biełaruskija temy. U tym liku i pra traktary — vyhladaje, što dla dalokich zamiežnikaŭ heta adna ź niešmatlikich tem, pa jakich jany viedajuć našu krainu. Voś takaja majka abydziecca vam u 11,72 dalara:
A hetaja pryhožaja cišotka z sercajkam ciapier kaštuje 4,81 dalara:
Možna padabrać dla siabie i biełaruski futbolny mierč, ale ž daloka nie ad usich kłubaŭ. Bolš za ŭsio prapanoŭ jość ź simvolikaj bresckaha «Dynama». Tut i chudzi (ad 22,31 dalara), i śvitšot (ad 12,54 dalara), i cišotka (ad 8,78 dalara), i navat panamka (ad 4,98 dalara).
Idziem dalej. Na Amazon možna znajści narodny stroj — pa śviedčańniach vytvorcy, hety stroj biełaruski i zrobleny ŭručnuju. Stvaraje jaho maskoŭskaja kampanija, ubor składajecca sa spadnicy, błuzy i nievialikaj kamizelki. Za jaho daviadziecca zapłacić 149 dalaraŭ.
Jašče adna cudoŭnaja znachodka — niekalki pazłaŭ z vyjavami biełaruskich słavutaściaŭ. Tut jość Mir, Nieśviž i minski Vierchni horad. Usie pazły składajucca z 1000 detalaŭ i kaštujuć 39,99 dalara — bavić čas z takim padarunkam možna doŭha.
Jość na markietpłejsach i anhłamoŭnyja knihi, častkova ci całkam pryśviečanyja Biełarusi. Da prykładu, heta kulinarnyja vydańni — praŭda, jašče pytańnie, nakolki jany dastaviernyja. Ale ž adznačym pierakład knihi ad viadomaj znaŭcy biełaruskaj kuchni Aleny Mikulčyk, u elektronnaj formie jon kaštuje 4,99 dalara.
Možna prydbać knihu navukoŭca Endru Ŭiłsana «Belarus: The Last European Dictatorship» — heta historyja našaj krainy z pačatku 90-ch da 2020 hoda, papiarovaja kniha abydziecca ŭ sumu ad 16 dalaraŭ. Chočacie niešta tańniejšaje? Jość tomik Artura Čyčestera «The Burning Edge: Travels through Irradiated Belarus» za 10,96 dalara ŭ papiarovaj viersii. Heta historyja padarožža brytanca, ciapier viadomaha pa naźvie svajho jutub-kanała Bald and Bankrupt, pa biełaruskaj čarnobylskaj zonie z mnostvam vodki, savieckimi aŭtobusnymi prypynkami i miascovymi babulami.
«Naša Niva» — bastyjon biełaruščyny
PADTRYMAĆČytajcie taksama:
Na luby biudžet: 10 niebanalnych padarunkaŭ da Dnia zakachanych
Vusy, jakija skaryli Polšču. Ci vyjhraje biełarus Pan Savyan dla palakaŭ «Jeŭrabačańnie»?
Biełaruscy prapanavali zarabić 18 tysiač rubloŭ za karotki taniec. I jana spraviłasia
Ciapier čytajuć
Zakančvajecca termin daŭniny pa narodnym pratesnym artykule. Bolš nikoha nie pasadziać? Nie, jość niuansy9
Kamientary
1. Trusy odievať tak, čto by hierb raspołahałsia s TYLNOJ STORONY. Vnutri.