Biełaruskija chirurhi adnaŭlajuć tvar mužčynu, na jakoha ŭpała plita. Na ruce jamu vyraścili nos — šakujučaja historyja
Biełaruskija daktary robiać unikalnuju apieracyju pa rekanstrukcyi tvaru. Toje, na što zdolnyja sučasnyja technałohii, vyhladaje fantastykaj.
Videa z etapami apieracyi daktary apublikavali ŭ sacyjalnych sietkach.
Što zdaryłasia z mužčynam? Viktar atrymaŭ traŭmu dva hady tamu. Na jaho ŭpała bietonnaja plita, ale jon vyžyŭ.
«My byli na rybałcy, skončylisia čarviaki, a tam pobač fierma zakinutaja stajała. My zajšli na hetu fiermu, kab nakapać čarviakoŭ. Śnieh unačy vypaŭ — skłaŭsia dach bietonny», — apisvaje ŭ videa sam Viktar, što było ŭ toj dzień.
Kali jaho dastali, na miescy tvaru było miesiva. Sa słoŭ Viktara, adno voka jon prahłynuŭ, jaho vyniali z hłotki i viarnuli na miesca (i jano zachavała funkcyjanalnaść).
Uvieś hety čas u mužčyny była praciahłaja reabilitacyja, šmat lekaraŭ dapamahali jamu adnavicca.
Kali jon trapiŭ da płastyčnych chirurhaŭ, jon byŭ bieź vierchniaj skivicy, biez nosa, z vyjaŭlenaj defarmacyjaj čerapa, nie moh narmalna dychać, havaryć, jeści, sacyjalizavacca.
Rekanstrukcyjaj tvaru zajmajecca hrupa minskich chirurhaŭ — Dźmitryj Ładućka, Alaksandr Varabjoŭ, Andrej Piekar, Alaksandra Hubičava, Alaksandr Barjaš, Dźmitryj Rumo, Maja Kazieka.
Nos jamu vyrašyli vyraścić — u pramym sensie. Na pieradpleččy mužčyny ŭžo 2 miesiacy «žyvie» sabrany daktarami ŭručnuju novy nos.
U ramkach hetaj apieracyi chirurhi ŭziali chrastok z rabra pacyjenta, asablivym čynam sfarmavali skurny łapik na pieradpleččy, źmiaścili tudy hety chrastok, jak asnovu dla budučaha nosa, sfarmavali nozdry.
Doktary pišuć, što heta tolki pačatak rekanstrukcyi tvaru. Viktara čakaje jašče šmat apieracyj. Ich asnoŭnaja zadača — nakolki heta mahčyma, viarnuć čałavieku jakaść žyćcia.
Aściarožna: foty nižej mohuć vas šakavać. Kali nie hatovy ich ubačyć, nie hartajcie nižej.
«Bulba» z Oršy pajšoŭ vajavać za Rasiju — ciapier siastra šukaje jaho ci chacia b jaho pareštki9
Kamientary