Va Ukrainie aryštavali vajskoŭca, datyčnaha da vykradańnia i zabojstva ŭ Łatvii hramadzianki Biełarusi
Va Ukrainie aryštavali dziejnaha vajskoŭca, jaki ŭ Łatvii ŭdzielničaŭ u vykradańni hramadzianki Biełarusi, kab prymusić jaje pierapisać svaju majomaść i biznes na dvuch hramadzian Rasii. Dla rasśledavańnia hetaha złačynstva, u vyniku jakoha hramadzianku Biełarusi zabili, Ukraina i Łatvija ŭ listapadzie 2022 hoda stvaryli supolnuju śledčuju hrupu, paviedamlaje «Radyjo Svaboda».
Incydent adbyŭsia 3 kastryčnika 2019 hoda. U rašeńni ŭkrainskaha suda imia hramadzianki Biełarusi nie ŭdakładniajecca, ale raniej łatvijskija ŚMI pisali pra zabojstva pradprymalnicy biełaruskaha pachodžańnia Iryny Minvalejevaj, jakaja stała pražyvała ŭ Łatvii i vałodała kampanijaj Resort Investments.
Baćka i syn, rasijskija hramadzianie, naniali dla arhanizacyi vykanańnia hetaha złačynstva troch ukraincaŭ — adzin ź ich zatrymany vajskoviec, a druhi — udzielnik dobraachvotnickaha bataljona «Tarnada», jaki zahinuŭ u śniežni 2022 hoda na bachmuckim kirunku. Pra treciuju asobu pakul nie paviedamlajuć.
Rasiejcy chacieli prymusić Irynu Minvalejevu pierapisać na ich majomaść kampanii Resort Investments, jakoj naležała 30 kvater, 56 parkamiescaŭ i dva niežyłyja pamiaškańni ŭ žyłym kompleksie Sun Republic, ahulnaj vartaściu 3 708 000 jeŭra.
Biełarusku vykrali i prymušali pierapisać majomaść na padkantrolny rasiejcam fond Latvijas atjaunosanas biedroba, jaki nibyta zajmaŭsia dapamohaj i reabilitacyjaj vieteranaŭ antyterarystyčnaj apieracyi na ŭschodzie Ukrainy. Ułaśniki fondu prapanavali ŭkraincam pravieści peŭnuju «pracu», źviazanuju nibyta z baraćboj z pradstaŭnikami FSB Rasii, u liku jakich jany nazvali biełarusku Irynu Minvalejevu, i tyja pahadzilisia.
Ukraincy vykrali biełarusku pad vyhladam namieru kupić kvateru ŭ žyłym kompleksie, potym pieravieźli ŭ inšaje miesca i kinuli ŭ pamiaškańnie, dzie znachodziŭsia basiejn. Joj prapanavali padpisać miemarandum i damovu dareńnia na karyść fonda Latvijas atjaunosanas biedroba, a kali taja admoviłasia, źviazali ruki i nohi i pryviazali achviaru da poručniaŭ basiejna. Praz hod paśla jaje zabojstva jany aformili na adpaviednym ukrainskim błanku davieranaść na rasparadžeńnie majomaściu zabitaj. Hetuju davieranaść vypisali na hramadzian Rasii, užo zhadanych baćki i syna.
Pavodle łatvijskich ŚMI, ciapier u Łatvii adbyvajecca sudovy praces nad hramadzianami Rasii Siarhiejem i Michaiłam Alaksiejevymi, jakija atrymali ŭ Łatvii status uciekačoŭ, a ciapier abvinavačvajucca ŭ zachopie zakładnicy. U ich paśla zabojstva Iryny Minvalejevaj znajšli jaje dakumienty: paśviedčańnie na kiravańnie aŭtamabilem i pašpart.
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj43
Kamientary