U Čyli bušujuć lasnyja pažary. Kolkaść zahinułych pieravaliła za sotniu
Prezident Čyli Habryel Boryč abviaściŭ nadzvyčajnaje stanovišča ŭ rehijonie Valparaisa.
Kolkaść achviar lasnych pažaraŭ u Čyli ŭžo pieravysiła 100 čałaviek. Pavodle apošnich źviestak, zahinuli 112 čałaviek, piša Bi-bi-si.
Prezident Čyli Habryel Boryč abviaściŭ nadzvyčajnaje stanovišča ŭ rehijonie Valparaisa i paabiacaŭ dać dla vyrašeńnia situacyi «ŭsie nieabchodnyja resursy».
Pažary ŭžo raspaŭsiudzilisia na šyrokuju terytoryju i kolkaść achviar moža vyraści, papiaredžvali ŭłady. Ciapier, pavodle ich źviestak, naličvajecca 40 aktyŭnych ačahoŭ pažaraŭ pa krainie.
Rehijanalny kamitet pa baraćbie ź lasnymi pažarami paviedamiŭ, što 45 zahinułych byli znojdzienyja miortvymi na miescy, astatnija pamierli ad atrymanych apiokaŭ užo ŭ balnicach.
Pažary pačalisia paśla pieryjadu letniaj śpioki z tempieraturaj, jakaja padniałasia vyšej za 33°S.
Na ich tušeńnie byli kinutyja 1400 pažarnych, armija, pažarnyja samaloty i viertaloty. Vyratavalnyja słužby sprabavali dabracca da najbolš paciarpiełych rajonaŭ, ale im pieraškadžali kałony mašyn ź ludźmi, jakija ratavalisia ad ahniu.
Pažary, jakija pačalisia ŭ harach, raspaŭsiudzilisia na prybiarežnyja rajony, dasiahnuŭšy haradoŭ Vińja-del-Mar i Valparaisa. Razam jany ŭtvarajuć šyroki rehijon na centralnym uźbiarežžy Čyli, u jakim pražyvaje bolš za miljon čałaviek.
Byli pierakrytyja niekalki aŭtamahistralaŭ, jakija viaduć ź Vińja-del-Mar. Ułady ŭviali kamiendanckuju hadzinu z 21:00, kab palehčyć pracu vyratavalnych słužbaŭ.
«My sutyknulisia ź biesprecedentnaj katastrofaj», — skazała mer horada Makarena Rypamonci.
Vińja-del-Mar, viadomy kurort, jaki karystajecca papularnaściu ŭ sierfieraŭ i turystaŭ, jakija pryjazdžajuć u hety rehijon, jaki słavicca svaimi vinami.
Mnohija paciarpiełyja, miarkujučy pa ŭsim, jakraz i byli turystami, jakija pryjechali ŭ Valparaisa padčas letnich vakacyj.
Ułady kažuć, što heta — samy śmiarotny pažar u historyi Čyli.
Ciapier čytajuć
Na tolki što adkrytaj polskaj miažy ŭžo ŭtvaryłasia čarha z troch tysiač aŭtamabilaŭ1
Kamientary