U ramkach mier pa «supraćdziejańni kibierzłačynstvam» ułady rychtujucca rabić «filtracyju» i deananimizacyju internetu — u tym liku dla taho, kab uskładnić hramadzianam dostup da niezaležnych infarmacyjnych resursaŭ. Adpaviedny dakumient znajšło na školnym sajcie vydańnie «Fłahštok».
Bolšaść niedziaržaŭnych hramadska-palityčnych vydańniaŭ i tak zabłakavanyja na terytoryi krainy, adnak zajści na ich staronki možna z dapamohaj VPN-servisaŭ. Vyhladaje, što ŭłady majuć namier z hetym zmahacca.
Hety dakumient biełaruskaha ŭrada aficyjna nie publikavaŭsia, ale dziŭnym čynam apynuŭsia na sajtach škoł, piša «Fłahštok».
Dakumient pad nazvaj «kompleksny płan mierapryjemstvaŭ, nakiravanych na pryniaćcie efiektyŭnych mier pa supraćdziejańni kibierzłačynstvam, prafiłaktycy ich ździajśnieńnia, pavyšeńniu ličbavaj piśmiennaści nasielnictva na 2024-2025 hady» zaćvierdžany ŭ listapadzie 2023 hoda vice-premjeram Piatrom Parchomčykam.
Anałahičnyja płany prymalisia i ŭ minułyja hady. Adnak, u adroźnieńnie ad papiarednich padobnych dakumientaŭ, u novym źjaviŭsia dadatkovy punkt:
«Vyvučeńnie mahčymaści raspracoŭki i ŭkaranieńnia sistemy pravierki sietkavych pakietaŭ pa źmieście (dpi-sistema) z metaj rehulavańnia i filtracyi trafiku dla efiektyŭnaha supraćdziejańnia vykarystańniu ananimajzieraŭ, VPN i proksisiervieraŭ u supraćpraŭnych metach u biełaruskim siehmiencie sietki internet».
Vykanańnie hetaj zadačy ŭskładziena na Minsuviazi, MUS, KDB, AAC i «inšyja zacikaŭlenyja orhany i arhanizacyi».
Sistema DPI (Deep Packet Inspection) — technałohija nazapašvańnia statystyčnych danych, pravierki i filtracyi sietkavych pakietaŭ pa ich źmieścivie. DPI-sistema dazvalaje vyznačać i fiksavać, na jakija sajty i ŭ jakija prahramy zachodziŭ karystalnik.
«Fłahštok» źviarnuŭsia pa kamientar z nahody pierśpiektyŭ ukaranieńnia dpi-sistemy da profilnaha śpiecyjalista:
«Novaŭviadzieńni, imavierna, buduć tyčycca biełaruskich internet-pravajdaraŭ. Za hetym vidać namier abmiežavać trafik biełaruskich karystalnikaŭ na zabaronienyja resursy praz błakavańnie VPN. U Rasii takoje ŭžo pačali realizoŭvać. Tam jość śpis VPN-servisaŭ, dostup da jakich zabaronieny. Heta, vidać, budzie zroblena i ŭ Biełarusi».
Čytajcie taksama:
Staŭ płatnym samy papularny ŭ biełarusaŭ VPN. Ale pakul nie dla ŭsich
U Rasii stvaryli «Tavaryša majora» dla vyjaŭleńnia administrataraŭ telehram-kanałaŭ
Jak ułasnymi rukami stvaryć VPN-siervier, jaki ciažka budzie zabłakavać — padrabiazny hajd
Jak čytać niezaležnyja ŚMI i nie padstaŭlacca — padrabiazny hajd
Hałoŭny ideołah Biełarusi znajšoŭ u krainie «psieŭdapatryjatyčnyja jačejki» i zaklikaŭ da zmahańnia ź imi «adzinym bajavym kułakom»23
Kamientary