U konkursie na najlepšuju paštovuju marku hoda sioleta znoŭ pieramahli siłaviki
«Biełpošta» apublikavała vyniki konkursu na najlepšuju biełaruskuju paštovuju marku 2023 hoda. Jak i ŭ minułym hodzie, pieramohu atrymała marka, źviazanaja ź siłavymi strukturami.
Pieramoha i zvańnie najlepšaha paštovaha vypusku — u marki «Ratavalnik» (№1492), pryśviečanaj supracoŭnikam Ministerstva nadzvyčajnych situacyj.
Na druhim miescy — błok «225 hadoŭ z dnia naradžeńnia Adama Mickieviča» (błok №162, marka №1543).
Urešcie, zamykaje trojku najlepšych mały list «Z Novym hodam i Naradžeńniem Chrystovym!» (marki №1527-1534).
Dyzajnierkaj usich troch marak-pieramožcaŭ źjaŭlajecca Jaŭhienija Biadonik.
U anłajn-hałasavańni sioleta ŭdzielničali 2037 čałaviek. Na praciahu dvuch śniežańskich tydniaŭ svoj hołas biełarusy pakidali na płatformie internet-partała «Biełpošta».
Ź siłavymi strukturami była źviazanaja i marka-pieramožca hetaha konkursu ŭ minułym hodzie. Tady pry padviadzieńni aficyjnych vynikaŭ konkursu na najlepšuju paštovuju marku Biełarusi 2022 hoda akazałasia, što kožny druhi z 32 tysiač čałaviek, jakija ŭziali ŭdzieł u hałasavańni, abraŭ mały list «Słužbovyja sabaki Pamiežnaj słužby Biełarusi» z vyjavaj aŭčarak i łabradora.
Ale pierad hetym u suviazi z hetym konkursam nie abyšłosia biez skandału. Kali konkurs u kancy 2021 hoda tolki abjavili, napierad u peŭny čas vyrvałasia marka niezadoŭha da taho likvidavanaj arhanizacyi «Achova ptušak Baćkaŭščyny» z vyjavaj biełaj sinicy. Ale paśla taho, jak situacyja stała nabyvać rezanans i za konkursam stali sačyć dy aktyŭna hałasavać za biełuju sinicu čytačy niezaležnych miedyja, jaje nieŭzabavie źniali z konkursu. Pierad tym suprać hetaj marki apałčylisia režymnyja prapahandysty.
Ciapier čytajuć
Kamientary