Da vajny «Hazpram» zabiaśpiečvaŭ kala 60% spažyvańnia hazu ŭ Hiermanii. Adklučeńnie pastavak u minułym hodzie i vybuchi na «Paŭnočnych patokach», spynieńnie šerahu pramysłovych vytvorčaściaŭ i miery ekanomii, da jakich byli vymušanyja źviartacca niemcy i inšyja žychary krain ES, prymušali rasijskich prapahandystaŭ absypać ich kpinami. Ale ŭ vyniku Hiermanija navučyłasia abychodzicca biez rasijskaha hazu, a tyja ž 60% jaho pastavak ciapier zabiaśpiečvaje demakratyčnaja kraina — Narviehija, piša The Moscow Times.
Najbujniejšy vytvorca hazu ŭ Jeŭropie, Narviehija stała hałoŭnym pastaŭščykom Hiermanii adrazu paśla sychodu «Hazprama». Z tych časoŭ baki zaklučyli jašče niekalki damoŭlenaściaŭ, a
na hetym tydni niamieckaja dziaržaŭnaja enierhietyčnaja kampanija Sefe i narviežskaja Equinor abjavili pra kantrakt na 50 młrd jeŭra, jaki dazvolić zabiaśpiečyć kala traciny pramysłovaha popytu na haz u Hiermanii. U vyniku dola Narviehii dasiahnie 60%, adznačaje Reuters.
Praŭda, takaja mocnaja zaležnaść ad adnaho pastaŭščyka niasie ŭ sabie ryzyki, chaj i nie takija, što byli źviazanyja z Rasijaj i dziejańniami «Hazprama». Ahulnyja palityčnyja pohlady Hiermanii i Narviehii źnižajuć vierahodnaść pierabojaŭ, ale nie harantujuć ad uźniknieńnia techničnych prablem, uličvajučy maštabnuju sietku trubapravodaŭ, jakija złučajuć Narviehiju z kantynientam, ličyć Chieninh Hłajštejn, analityk Eurasia Group. Zrešty, razhalinavanaść sietki dadaje nadziejnaści, ahavorvajecca jon: pry nieabchodnaści haz možna puścić pa inšaj halincy.
Dadatkovymi krynicami impartu stali pastaŭki zvadkavanaha pryrodnaha hazu. Hiermanija, u pryvatnaści, padpisała doŭhaterminovyja damovy z amierykanskimi Conoco Phillips i Venture Global. Akramia taho, jana skaraciła spažyvańnie, choć jaje pramysłovaść usio jašče mocna zaležyć ad pastavak elektryčnaści z hazavych stancyj i hazu jak syraviny.
U vyniku siaredniamiesiačny impart hazu ŭ Hiermanii skaraciŭsia sioleta bolš čym na 25% u paraŭnańni ź minułym. A ŭ dalejšym u ramkach zialonaha pierachodu niemcy płanujuć jašče bolš pamienšyć jaho spažyvańnie. Ździełka pamiž Sefe i Equinor praduhledžvaje zamienu hazu pastaŭkami vadarodu z 2029 hoda.
Tym časam cana hazu ŭ Jeŭropie (fjučers Dutch TTF) ciapier składaje kala 34 jeŭra/MVt·h. Heta ŭ 10 razoŭ nižej, čym u žniŭni 2022 hoda, kali jana pieravysiła 340 jeŭra (abo kala 3600 jeŭra za 1000 kubamietraŭ). Dźmitryj Miadźviedzieŭ tady abiacaŭ Jeŭropie haz pa 5000 jeŭra za 1000 kuboŭ, ale adrazu paśla jaho zajavy cana skiravałasia ŭniz.
Hetaj vosieńniu ES značna raniej hrafika zapoŭniŭ hazaschoviščy da krajoŭ. Z pačatkam aciaplalnaha siezona zapasy skaracilisia, ale nie vielmi; ciapier u ich 87,6% hazu.
Słova «Unavatuna» značyć «raj». Dzie na Šry-Łancy adpačyvała Mielnikava13
Kamientary