U Minsku chłopiec paprasiŭ u kafe dla svajoj dziaŭčyny dziciačaje mieniu. Administracyja ŭstanovy ździviłasia

Jahor ź Minska razam ź dziaŭčynaj zajšoŭ u kafe i paprasiŭ dla jaje dziciačaje mieniu: «Dziaŭčyna minijaciurnaja, jeść maleńkija porcyi. Ale ŭ kafe vydavać dziciačaje mieniu nam nie chacieli. Chočacca daviedacca, nakolki heta pravamierna», — zapytaŭsia małady čałaviek u Onliner.by.

Jahor nie chavaje, što jahonaja razmova z administratarkaj kafe dajšła da kanfliktu. Administratarka tłumačyła, što va ŭstanovie prynosiać mieniu tolki haściam ź dziećmi, heta rehłamientujecca ŭnutranym rasparadžeńniem. Jahor ža nastojvaŭ, kab jamu prynieśli i pakazali hetaje rasparadžeńnie, ale jon ničoha nie atrymaŭ.

«Potym ja dastaŭ telefon i skazaŭ: chaču, kab administratarka mnie na kamieru skazała, što jany nie vydajuć dziciačaje mieniu z-za niejkaha svajho ŭnutranaha rasparadžeńnia. Paśla hetych maich słoŭ jana nie toje, kab špurnuła mnie heta dziciačaje mieniu — addała z pahardaj i syšła. Nam ź dziaŭčynaj zastavacca ŭ kaviarni nie chaciełasia, my syšli». Na raźvitańnie chłopiec pakinuŭ zapis u knizie skarhaŭ.

Paśla hetaha Jahor ź dziaŭčynaj pajšli ŭ inšaje kafe i ŭbačyli ŭ mieniu dziciačy kapučyna. «Ja spytaŭ u rabotnic, ci pradaduć mnie dziciačy kapučyna, kali ja ŭžo nie dzicia. Jany adkazali, što, viadoma, pradaduć i im nie važna, ci jość sa mnoj dzicia», — raspavioŭ małady čałaviek.

Viersija kafe

Onliner.by paprasiŭ rabotnikaŭ kafe prakamientavać situacyju. U vusnaj razmovie skazali, što dziciačaje mieniu — heta śpiecprapanova, jakaja dziejničaje na peŭnych umovach. A mienavita — jaho prynosiać za stoliki haściej, dzie jość dzieci. Taksama da śpiecprapanovy adnosicca abiedziennaje mieniu (jano dziejničaje tolki ŭ peŭnyja hadziny), akcyja «2 picy pa canie 1» (dziejničaje tolki pa aŭtorkach).

U piśmovym adkazie ad kafe źmiaščałasia nastupnaja infarmacyja: «Dziciačaje mieniu hościu dali. Mahčyma, u momant pieršapačatkovaha zvarotu hościa dziciačaha mieniu nie było ŭ najaŭnaści ŭ aficyjanta, bo nas u restaranie na toj momant było šmat maleńkich haściej albo byli jašče niejkija składanaści z pradastaŭleńniem jaho. Dziciačaje mieniu pry paŭtornym zvarocie było addadziena, ale hość sam admoviŭsia rabić pa im zakaz, što taksama jon ukazaŭ u svajoj zaŭvazie».

Dziciačaje mieniu tolki dla dziaciej? Adkazvaje juryst

Śpiecyjalist pa pravach spažyŭcoŭ, juryst Ivan Rajkievič kaža, što kafe było abaviazana dać dziciačaje mieniu choć by dla aznajamleńnia, pakolki vytvorca (pradaviec, pastaŭščyk, pradstaŭnik, vykanaŭca) abaviazany svoječasova davać spažyŭcu nieabchodnuju dakładnuju infarmacyju ab prapanavanych tavarach (pracy, pasłuhach). Heta prapisana ŭ zakonie ab abaronie pravoŭ spažyŭcoŭ, a mienavita ŭ pp. 1.2 p. 1 art. 5.

Tym nie mienš u kafe jość mahčymaść asobna ŭrehulavać pytańnie ab realizacyi straŭ ź dziciačaha mieniu. Naprykład, aformić ich jak akcyjnyja stravy. Ale, kaža juryst, akcyi treba afarmlać, i, kali heta zrabić niapravilna, pytańni mohuć źjavicca ŭ orhanaŭ kantrolu.

• 1
• 0
• 9
• 28
• 1
• 2
• 8
• 0