Łaŭroŭ prylacieŭ na samit ABSIE ŭ Skopje praz Hrecyju, a nie praz Bałharyju
Hrecyja i Bałharyja jak čalcy ES u lutym 2022-ha zakryli svaju pavietranuju prastoru dla rasijskich łajnieraŭ. Bałharyja adkryła nieba dla samalota Łaŭrova, ale dazvoł nie raspaŭsiudžvaŭsia na Maryju Zacharavu. Łajnier prybyŭ u Skopje, piša RBK.
Kiraŭnik MZS Rasii Siarhiej Łaŭroŭ prylacieŭ u stalicu Paŭnočnaj Makiedonii Skopje na sustreču sa svaimi kalehami z krain Arhanizacyi pa biaśpiecy i supracoŭnictvie ŭ Jeŭropie (ABSIE).
Pa danych servisaŭ adsočvańnia palotaŭ Flightradar24 i FlightAware, samalot Łaŭrova (RSD308) lacieŭ z Rasii nad Čornym moram, a zatym nad terytoryjaj Turcyi i Hrecyi, paśla čaho ŭvajšoŭ u pavietranuju prastoru Paŭnočnaj Makiedonii, piša RBK.
27 listapada ministr, kažučy pra mahčymaść uziać udzieł u pasiadžeńni Rady ministraŭ zamiežnych spraŭ ABSIE, kazaŭ, što heta zaležyć ad taho, ci adkryje dla rasijskaha samalota svaju pavietranuju prastoru Bałharyja, jana «byccam by abiacała» heta Paŭnočnaj Makiedonii. Z kanca lutaha 2022-ha nieba krain Jeŭrasajuza zakryta dla pralotu łajnieraŭ avijakampanij z Rasii. I Bałharyja, i Hrecyja — členy ES.
Paŭnočnaja Makiedonija nie maje takoha statusu, ale jana taksama dałučyłasia da zabarony ES. Jak paviedamlała Associated Press, kraina vyrašyła na čas praviadzieńnia pasiadžeńnia adkryć pavietranuju prastoru, kab Łaŭroŭ moh prybyć na mierapryjemstva.
Pradstaŭnica MZS Rasii Maryja Zacharava ŭ telehram-kanale paviedamiła, što palot praz Bałharyju byŭ niemahčymy, bo dazvoł krainy nie raspaŭsiudžvaŭsia na jaje asabista. «Samalotu pralacieć nad Bałharyjaj možna, a Maryi Zacharavaj u samalocie lacieć nielha», — patłumačyła dypłamat.
Samit projdzie 30 listapada — 1 śniežnia. MZS Rasii nazvała jaho klučavoj temaj kryzis, jaki skłaŭsia ŭ ABSIE. U viedamstvie paviedamili, što ŭ rasijskaj delehacyi zapłanavany kantakty «z pradstaŭnikami dziaržaŭ-udzielnic i kiraŭnictvam arhanizacyi».
Kamientary