«Śmiajusia, a ŭ horle kom». NaviBand vypuściŭ novy sinhł dla tych, chto sumuje pa domie
Napiaredadni vialikaha hastrolnaha tura pa krainach Jeŭropy hurt NaviBand vydaŭ sinhł i proma-videa «Pojezd», u jakich nastalhuje pa rodnaj Biełarusi. «Pojezd» — heta pierakładzienaja na biełaruskuju movu i całkam pierazapisanaja pieśnia «Vdal». Paśla vymušanaha adjezdu ź Biełarusi jana nabyła dla muzykaŭ novy sens.
«Ź luboŭju i sumam da rodnaha kraju. Usim, chto nie doma, pryśviačajecca», — pišuć muzyki ŭ svaich sacsietkach.
«U sučasnych abstavinach dla nas hetaja pieśnia pra toje, što šmat kamu daviałosia pakinuć svoj dom, sieści ŭ svoj umoŭny niepažadany ciahnik i pajechać u bok nieviadomaści.
Pieśnia pra sum pa radzimie, ale z nadziejaj na lepšaje», — raspaviadaje aŭtar pieśni i pierakładu Arciom Łukjanienka.
Pra heta ž — radzimu i nadzieju — raspaviadaje i raźmieščanaje ŭ sacsietkach hurta proma-videa, jakoje hurt zrabiŭ z mastačkaj Alenaj Katoŭskaj.
«Jak i ŭsie vymušanyja źjechać, my časam siadzim i pierahladajem svaje staryja zdymki ź Biełarusi, pavialičvajučy ich, kab uzhadać detali, pieražyć hetyja momanty iznoŭ», — dadaje Arciom.
Mienavita ŭ hetaj viersii pieśnia hučyć zaraz na kancertach hurta NaviBand, jakija chutka raspačnie vialiki jeŭrapiejski tur.
Vystupy adbuducca ŭ Poznani (17 kastryčnika), Urocłavie (18 kastryčnika), Bierlinie (21 kastryčnika), Miunchienie (22 kastryčnika), Prazie (23 kastryčnika), Krakavie (25 kastryčnika), Limasole (9 listapada), Lublinie (16 listapada), Vilni (18 listapada), Ryzie (19 listapada).
Sinhł «Pojezd» dastupny na ŭsich placoŭkach.
U instahram-roliku možna ŭbačyć nie tolki ilustracyi z muzykami, ale i lubimyja miescy z roznych biełaruskich haradoŭ: «Varoty Minska», Asmałoŭku, dramteatr u Hrodnie, vakzał u Breście i inšyja.
Ciapier čytajuć
Byłoha biełaruskaha palitviaźnia sudziać u Litvie za padrychtoŭku da zabojstva praciŭnikaŭ Kramla. Pahražaje až da pažyćciovaha11
Kamientary
Pa-biełarusku: udalečyniu adjazdžaje ciahnik, na jaki ja nie chacieŭ siadać.