«O boža, heta niadobra!» Mask raskazaŭ pra «cudoŭnuju razmovu» z Pucinym
Amierykanski biznesoviec, uładalnik Tesla, SpaceX i sacsietki X (byłaja Twitter) Iłan Mask vosieńniu minułaha hoda paviedamiŭ pradstaŭnikam Pientahona, što mieŭ razmovy z Uładzimiram Pucinym, abmierkavaŭšy ź im situacyju va Ukrainie, paviedamlaje RBK sa spasyłkaj na The New Yorker.
Adna z krynic vydańnia ŭ Minabarony ZŠA raspaviała, što pry abmierkavańni z amierykanskimi čynoŭnikami vykarystańnia terminałaŭ Starlink va Ukrainie ŭ kastryčniku minułaha hoda Mask zhadaŭ pra razmovu z Pucinym. «Jon skazaŭ: «Što ž, u mianie była vydatnaja razmova z Pucinym». I my padumali: «O boža, heta niadobra», — adznačyŭ vysokapastaŭleny čynoŭnik ź Pientahona.
Sa słoŭ inšaha surazmoŭcy haziety, Mask zajaviŭ, što asabista razmaŭlaŭ z Pucinym za niekalki tydniaŭ da taho, jak apublikavaŭ u tvitary svoj varyjant mirnaha płana, i dadaŭ, što jaho kansultacyi z Kramlom byli rehularnymi.
Pra toje, što pierad publikacyjaj svajho mirnaha płana Mask mieŭ razmovu z Pucinym, u kastryčniku minułaha hoda pisaŭ Vice sa spasyłkaj na ekanamista Jana Bremiera.
Sam biznesoviec źniapraŭdziŭ hetuju infarmacyju. «Heta niapraŭda. Ja razmaŭlaŭ z Pucinym tolki adnojčy, i heta było kala 18 miesiacaŭ tamu. Temaj byŭ kosmas», — paviedamiŭ jon u Twitter, kamientujučy publikacyju Vice.
U pačatku kastryčnika minułaha hoda Mask apublikavaŭ u Twitter apytańnie, dzie prapanavaŭ prahałasavać za abo suprać svajho bačańnia mirnaha ŭrehulavańnia kanfliktu va Ukrainie. U pryvatnaści, jon vykazaŭ zdahadku, što kanflikt skončycca tym, što Krym zastaniecca častkaj Rasii, a ŭ zaniatych rasijskimi vojskami rehijonach paŭtorna projduć refierendumy pad nahladam AAN. Akramia taho, pavodle jaho słoŭ, mirnaje pahadnieńnie moža praduhledžvać, što Ukraina zastaniecca niejtralnaj krainaj, a baki damoviacca ab vodazabieśpiačeńni Kryma.
Mask taksama zajaviŭ, što ŭ vypadku «tatalnaj vajny» z Rasijaj pieramoha Ukrainy budzie małaimaviernaj. Na dumku Maska, vyniki refierendumaŭ u «DNR», «ŁNR», akupavanych častkach Zaparožskaj i Chiersonskaj abłaściej źviazanyja z tym, što «ŭ niekatorych uschodnich rehijonach krainy bolšaść nasielnictva składajuć rasijanie i jany addajuć pieravahu Rasii».
Kijeŭ niehatyŭna adreahavaŭ na publikacyi biznesmiena.
Praź dzieviać miesiacaŭ paśla vyzvaleńnia pamior palitviazień Valeryj Bohdan7
Kamientary