Biełarusy ŭ Polščy i Litvie vyznačylisia, na što pojduć sabranyja imi padatki
Piłotny prajekt pa ličbavym samakiravańni na płatformie «Novaja Biełaruś» doŭžyŭsia niekalki miesiacaŭ, i, narešcie, vyznačylisia jaho pieramožcy.
U čym była sutnaść prajekta? Biełarusy, što žyvuć u Polščy i Litvie, mohuć sami zapoŭnić padatkovuju dekłaracyju i nakiravać peŭny pracent svaich padatkaŭ na dabračynnaść — 1,5% u Polščy i 1,2% u Litvie.
Heta prykładna 20—30 jeŭra pavodle siaredniaha zarobku ŭ hetych krainach.
«Novaja Biełaruś» prapanavała ludziam vybrać, kudy skiravać hetyja hrošy.
U mai biełarusy, jakija płaciać padatki ŭ Polščy i Litvie, mahli nakiravać adsotak na dabračynnaść u fondy-partniory «Novaj Biełarusi» («Tutaka», Littouwin Lions Club i Fanimani), kab potym samastojna vyrašyć, jakuju prablemu biełaruskaj supolnaści vyrašyć na hetyja hrošy. Udzielniki prapanoŭvali idei prajektaŭ i hałasavali za ich.
Ahułam u piłotny prajekt pa ličbavym samakiravańni praz padatki i ŭnioski pieraličana 13 004,6 jeŭra ŭ Litvie i minimum 8 010 jeŭra ŭ Polščy (dakładnaja suma budzie viadomaja paźniej).
U vyniku pieramahli nastupnyja idei.
U Polščy — anhłamoŭny partał pa historyi Biełarusi.
Budzie stvorany anhłamoŭny partał, dzie budzie raskazvacca pra historyju Biełarusi tak, jak bačać jaje biełarusy. «Meta prajekta — viarnuć Biełaruś na histaryčnyja mapy Jeŭropy, danieści naš pohlad na historyju da ŭsiaho śvietu, padkreślić unikalnych asob i padziei, źjaŭleńnie jakich niemahčyma patłumačyć pa-za kantekstam Biełarusi», — tłumačać aŭtary idei.
U Litvie pieramožcaj stała biełaruskaja biblijateka.
Stvorać biblijateku z sučasnaj biełaruskaj litaraturaj dla dziaciej i darosłych. «Na bazie biblijateki možna budzie arhanizavać inšyja aktyŭnaści: čytalny kłub biełaruskaj litaratury, zaprašać piśmieńnikaŭ», — ličać aŭtary.
Što budzie dalej
Pieramožcy majuć ažyćciavić svaje idei ciaham hoda i zrabić spravazdaču.
Kamanda «Novaj Biełarusi» prapanuje aŭtaram idej svaju ekśpiertnuju dapamohu na ŭsich etapach realizacyi prajekta. A ŭsie achvotnyja zmohuć nazirać za jaho realizacyjaj praz supołki.
Usim biełarusam, jakija žyvuć u emihracyi i ŭ nastupnym hodzie chočuć realizavać tak svoj prajekt, kamanda «Novaj Biełarusi» prapanuje napisać joj na poštu [email protected].
Biełarusy ŭ Polščy i Litvie vybirajuć, na jakija biełaruskija prajekty addać častku padatkaŭ. Idei roznyja
Biełarusy Litvy mohuć pieraličyć častku svaich padatkaŭ biełaruskim arhanizacyjam. Padrabiaznaja instrukcyja
Kavaleŭski raskazaŭ i pakazaŭ, što ź siabie budzie ŭjaŭlać biełaruski alternatyŭny pašpart
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary