Fiederacyja amierykanskich navukoŭcaŭ (FAS) paviedamiła, što na terytoryi 465-j rakietnaj bryhady ŭ Asipovičach zavieršana budaŭnictva anharaŭ dla rakietnych puskavych ustanovak «Iskander», jakija mohuć nieści jadziernyja bojehałoŭki, piša «Biełaruski Hajun».
Heta paćviardžajecca analizam novych spadarožnikavych zdymkaŭ. Pa infarmacyi FAS, budaŭnictva pačałosia ŭ kastryčniku 2022 hoda i było zavieršana ŭ krasaviku 2023 hoda.
Na zdymku Maxar ad 4 lipienia 2023 hoda bačnyja 4 puskavyja ŭstanoŭki «Iskander» i dźvie mašyny padtrymki mienšaha pamieru za miežami haraža. Pry hetym adsiek dla zachoŭvańnia rakiet na adnoj z puskavych ustanovak adkryty.
FAS piša, što novy abjekt raźmieščany ŭsiaho za 7 km ad Asipovickaha palihona i za 12 km ad składa zbroi, dzie moža adbyvacca patencyjnaja madernizacyja časovaha schovišča jadziernych bojehałovak. Akramia taho, adlehłaść ad anhara da namiotavaha łahiera PVK «Vahnier» u vioscy Cel składaje 16,5 km.
«Iskandery» pastupili na ŭzbrajeńnie 465-j rakietnaj bryhady Uzbrojenych sił Biełarusi jašče ŭ lutym 2023 hoda, a raniej na ŭzbrajeńni hetaj bryhady znachodziłasia tolki niekalki dyvizijonaŭ TRK «Točka-U». Jak tolki pieršyja ATRK «Iskander» prybyli ŭ raźmiaščeńnie bryhady, to ich pieršapačatkova raźmiaścili ŭ časovych boksach, i budaŭnictva dla ich anhara było nieabchodnaściu.
U krasaviku raźliki ATRK «Iskander-M» mienavita hetaj, 465-j rakietnaj bryhady, prachodzili praktyčnuju padrychtoŭku ŭ Rasii. Tady paviedamlałasia, što asabovy skład vyvučaŭ pytańni źmiestu i prymianieńnia taktyčnych jadziernych bojeprypasaŭ.
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła24
Kamientary