Amierykanskija analityki raźviejali tryvohi z nahody vahnieraŭcaŭ u Biełarusi
Siły vahnieraŭcaŭ u Biełarusi nie ŭjaŭlajuć vajennaj pahrozy dla Polščy ci Ukrainy — da toj pary, pakul nie buduć asnaščanyja ciažkim uzbrajeńniem. Ale i ŭ takim vypadku jany nie ŭjaŭlajuć surjoznaj pahrozy dla NATA. Takija vysnovy ŭtrymlivaje apošniaja spravazdača amierykanskaha Instytuta vajennych daśledavańniaŭ (ISW).
ISW analizuje sustreču ŭ hetuju niadzielu Uładzimira Pucina i Alaksandra Łukašenki ŭ Sankt-Pieciarburhu, padčas jakoj dva aŭtarytarnyja sajuźniki abmierkavali hrupu Vahniera jak pahrozu dla Polščy.
«Niama nijakich ukazańniaŭ na toje, što bajeviki hrupy Vahniera ŭ Biełarusi vałodajuć ciažkim uzbrajeńniem, nieabchodnym dla surjoznaha nastupu na Ukrainu ci Polšču biez surjoznaha padmacavańnia, pakolki pieradača takoj zbroi ad vahnieraŭcaŭ ministerstvu abarony Rasiei była ŭmovaj damoŭlenaści pamiž Pucinym, Łukašenkam i Pryhožynym, jakaja pakłała kaniec uzbrojenamu miaciažu ŭ červieni», — padkreślivaje ISW.
U spravazdačy adznačajecca, što hrupa Vahniera ŭ Biełarusi «nie ŭjaŭlaje vajennaj pahrozy dla Polščy ci Ukrainy, kali na toje pajšło, da taho času, pakul jany nie buduć pieraasnaščanyja miechanizavanaj technikaj. Navat tady jany nie ŭjaŭlajuć surjoznaj pahrozy dla NATA».
Zajava ž Łukašenki ab tym, što hrupa Vahniera zastajecca ŭ centralnaj Biełarusi, vierahodna, tonki namiok Pucinu na pahrozu, jakuju hetaja vajennaja hrupoŭka ŭsio jašče dla jaho ŭjaŭlaje. Bo ciapier, jak adznačajecca ŭ spravazdačy, adlehłaść da Maskvy ad łahieru vahnieraŭcaŭ udvaja mienšaja (720 km), čym ad byłoj bazy ŭ Krasnadarskim krai (prykładna 1370 km).
ISW źviartaje ŭvahu na toje, što padčas sustrečy z Łukašenkam Pucin zrabiŭ niekalki simvaličnych žestaŭ, jakija pavinny byli śviedčyć pra jaho ŭładu i daminavańnie nad frakcyjaj prychilnikaŭ Pryhožyna, skancentravanaj u Sankt-Pieciarburhu.
Pucin advioz Łukašenku ŭ Kranštat, port-krepaść, dzie ŭ 1921 hodzie sałdaty i matrosy raspačali niaŭdałuju sprobu antybalšavickaha paŭstańnia. Akramia taho, abodvuch lidaraŭ supravadžali hubiernatar Sankt-Pieciarburhu Alaksandr Biahłoŭ i małodšaja dačka ministra abarony Rasiei Siarhieja Šajhu Ksienija. Viadoma, što Biahłoŭ i Šajhu — asabistyja vorahi Pryhožyna. Pucin taksama sfatahrafavaŭsia ź miascovymi žycharami, u tym liku ź dziećmi.
«Hetyja simvaličnyja žesty śviedčać pra toje, što Pucin zaniepakojeny svajoj papularnaściu, biaśpiekaj svajho režymu i dziejnaściu šerahu frakcyj, jakija zmahajucca za ŭładu ŭ najvyšejšych ešałonach rasiejskaj ułady»,
— aceńvaje ISW.
Čytajcie jašče:
Łukašenka zajaviŭ, što strymlivaje vahnieraŭcaŭ ad ekskursii ŭ Varšavu i Žešaŭ
U Biełarusi ŭžo minimum 3500 «vahnieraŭcaŭ» — Biełaruski Hajun
Kamientary