U Mahilovie mužčynu asudzili na dva hady za dva łajki ŭ «Adnakłaśnikach»
10 lipienia sud Kastryčnickaha rajona Mahilova asudziŭ 29-hadovaha mahiloŭca Dźmitryja Papkova da dvuch hadoŭ pazbaŭleńnia voli va ŭmovach ahulnaha režymu. Mužčynu pryznali vinavatym u paklopie (č. 2 art. 367 KK) i abrazie (č. 1 art. 368) Alaksandra Łukašenki, piša Mayday.
Letam i vosieńniu 2021 hoda Papkoŭ dvojčy pastaviŭ adznaku «kłas» na dopisy ŭ pabliku «Stop Łuka» ŭ «Adnakłaśnikach», z-za čaho publikacyi stali bačnyja ŭ stužcy na staroncy mahiloŭca. U dopisach była infarmacyja ab dziejnaści Alaksandra Łukašenki, jakaja, na dumku suda, była paklopnickaj i jakaja źniesłaŭlała kiraŭnika ŭładnaj viertykali.
Mužčyna pryznaŭ svaju vinu.
Sudździa Kastryčnickaha rajona Mahilova Natalla Jasienka vyrašyła, što svaimi dziejańniami Papkoŭ nibyta spryjaŭ pašyreńniu kanfliktu ŭ hramadstvie na hlebie adroźnieńniaŭ u hramadska-palityčnych pohladach, i pakarała mahiloŭca realnym pazbaŭleńniem voli terminam na dva hady.
Kamientary