Vučonyja vyjavili novy miechanizm stymulacyi rostu vałasoŭ

Daśledčaja hrupa navukoŭcaŭ Kalifarnijskaha ŭniviersiteta vyjaviła praces, pry jakim kletki skury, što starejuć, vypracoŭvajuć pihmient, jaki vyklikaje značny rost vałasoŭ u nievusach (radzimkach).

Adkryćcio moža pakłaści asnovu dla zusim novaha pakaleńnia malekularnaj terapii andrahiennaj ałapiecyi (abłysieńnia) — raspaŭsiudžanaha hienietyčnaha zachvorvańnia, jakoje vyklikaje vypadzieńnie vałasoŭ jak u žančyn, tak i ŭ mužčyn.

Daŭno zaŭvažana, što pihmientnyja radzimki na skury čałavieka časta demanstrujuć praźmierny rost vałasoŭ, što śviedčyć ab hipieraktyŭnaści stvałavych kletak vałasoŭ.

U daśledavańni, apublikavanym u časopisie Nature, apisvajecca važnaja rola, jakuju adyhryvajuć malekuły białku asteapantynu i receptara CD44 u aktyvacyi rostu vałasoŭ. Hetyja radzimki nazapašvajuć asabliva vialikuju kolkaść sastarełych pihmientnych kletak i tym nie mienš demanstrujuć vielmi aktyŭny rost vałasoŭ.

Navukoŭcy vyjavili, što sastarełyja pihmientnyja kletki vyrablajuć vialikuju kolkaść śpiecyfičnaj sihnalnaj malekuły białku asteapantynu, jakaja prymušaje zvyčajna nieaktyŭnyja i minijaciurnyja vałasianyja falikuły aktyvavać svaje stvałavyja kletki dla ŭstojlivaha rostu doŭhich i hustych vałasoŭ.

Daśledčyki adznačajuć, što sastarełyja (sieniescentnyja) kletki zvyčajna ličacca škodnymi dla rehienieracyi i, jak miarkujecca, zapuskajuć praces stareńnia, ale heta daśledavańnie jasna pakazvaje, što kletačnaje stareńnie maje i stanoŭčy bok.

Rost vałasianych falikułaŭ dobra rehulujecca aktyvacyjaj stvałavych kletak. U vyniku sieniescentnyja kletki dzielacca, dazvalajučy falikułam cyklična vyrablać novyja vałasy. Paśla kožnaha pieryjadu rostu vałasoŭ nadychodzić pieryjad spakoju, na praciahu jakoha stvałavyja kletki falikułaŭ zastajucca nieaktyŭnymi da pačatku nastupnaha cykła.

U svaim daśledavańni vučonyja vykarystoŭvali myšej, u jakich aktyvavali hieny, źviazanyja z raźvićciom nievusaŭ na skury. Hetyja nievusy mieli hipieraktyvavanyja stvałavyja kletki vałasoŭ i demanstravali paskorany rost vałasoŭ.

Jak adznačajecca ŭ daśledavańni, heta vielmi nahadvaje kliničnyja nazirańni, zarehistravanyja ŭ radzimkach na vałasianoj častcy skury čałavieka.

Dalejšy padrabiazny analiz sastarełych pihmientnych kletak i najbližejšych stvałavych kletak vałasoŭ pakazaŭ, što pieršyja pradukujuć vysoki ŭzrovień sihnalnaj malekuły białku asteapantynu, dla jakoj stvałavyja kletki vałasoŭ majuć adpaviednuju malekułu receptara — CD44.

Pry malekularnym uzajemadziejańni pamiž asteapantynam i CD44 stvałavyja kletki vałasoŭ aktyvavalisia, što pryvodziła da ŭstojlivaha rostu vałasoŭ.

Upłyŭ asteapantynu na rost vałasoŭ taksama byŭ paćvierdžany va ŭzorach miełanacytarnych nievusaŭ, uziatych u ludziej.

Navukoŭcy adznačajuć, što heta adkryćcio patencyjna moža być vykarystana dla raspracoŭki novych mietadaŭ lačeńnia šyrokaha śpiektra rehienieratyŭnych parušeńniaŭ, u tym liku zvyčajnaha vypadzieńnia vałasoŭ.

Čytajcie jašče:

Vučonyja ličać, što kučaravyja vałasy davali ich uładalnikam evalucyjnuju pieravahu

«Patraciŭ 2 tysiačy dalaraŭ — było viesieła». Biełarus raskazaŭ, jak rabiŭ transpłantacyju vałasoŭ u Turcyi

Vałasy paśla myćcia: vysušyć ci pakinuć, kab sochli sami?

• 17
• 0
• 3
• 0
• 5
• 1
• 3
• 0