1 śniežnia staŭka refinansavańnia pavinna pamienšycca z 14% da 13,5% hadavych

a ŭ pieršym paŭhodździ 2010 hoda pracentnyja staŭki na biełaruskim rynku vyjduć na dakryzisny ŭzrovień.

Pra heta zajaviŭ staršynia Nacbanka Piotr Prakapovič u chodzie dakłada Alaksandru Łukašenku 19 listapada, paviedamiła pres-słužba prezidenta.

Pavodle słoŭ Prakapoviča, u studzieni—kastryčniku 2009 hoda vykanany ŭsie pakazčyki Asnoŭnych kirunkaŭ hrašova-kredytnaj palityki Biełarusi.

Stabilnym zastajecca kurs nacyjanalnaj valuty, jaki ŭ dačynieńni da košyka zamiežnych valut vahajecca ŭ miežach abjaŭlenaha kalidora +/-10%.

Mižnarodnyja reziervovyja aktyvy Biełarusi, raźličanyja ŭ adpaviednaści ź mietadałohijaj MVF, pavialičylisia z 3,1 młrd. dołaraŭ ZŠA na 1 studzienia da 4,43 młrd. na 1 listapada. Čakajecca, što na 1 studzienia 2010 hoda jany składuć nie mienš čym 5 młrd. dołaraŭ.

Prakapovič taksama prainfarmavaŭ, što ŭ Biełarusi zakončyła rabotu čarhovaja misija MVF pa prahramie stand-by. Na 1 kastryčnika Nacyjanalny bank vykanaŭ usie pakazčyki pa hetaj prahramie. Vyniki raboty misii ŭ najbližejšy čas buduć razhledžany na pasiadžeńni Savieta dyrektaraŭ MVF. «My ŭpeŭnieny ŭ tym, što čarhovaja tranša kredytu MVF budzie atrymana ŭ śniežni», — skazaŭ kiraŭnik Nacbanka.

Pavodle jaho słoŭ, bankaŭskaja sistema sioleta zabiaśpiečvaje nieabchodnaje kredytavańnie ekanomiki.

Hety pakazčyk u paraŭnańni z 1 listapada 2008 hoda pavialičyŭsia bolš čym u 1,4 razu, ilhotnaje kredytavańnie žylla — u 1,7 razu.

Łukašenka daručyŭ Nacbanku zabiaśpiečyć vykanańnie Asnoŭnych kirunkaŭ hrašova-kredytnaj palityki Biełarusi ŭ cełym pa hodzie i zapatrabavaŭ užo ŭ najbližejšy čas razam z uradam zaviaršyć rabotu nad prajektam prahnozu sacyjalna-ekanamičnaha raźvićcia na 2010 hod, prajektam biudžetu i Asnoŭnych kirunkaŭ hrašova-kredytnaj palityki. Prakapovič adznačyŭ, što ŭsie daručeńni Łukašenki pa hetych dakumientach vykanany, i nie paźniej jak 23 listapada jany buduć uniesieny na razhlad. Čakajecca, što kančatkovaje rašeńnie pa dakumientach budzie pryniata na nastupnym tydni. «Nam vielmi važna ŭžo ŭ hetym miesiacy atrymać prahnoznyja pakazčyki sacyjalna-ekanamičnaha raźvićcia na 2010 hod, a taksama pa asnoŭnych kirunkach hrašova-kredytnaj palityki, kab jak maha chutčej pačynać kankretnuju rabotu pa ich realizacyi», — skazaŭ Prakapovič.

Płanujecca, što ŭ nazvanych dakumientach buduć zamacavany pakazčyki, jakija zabiaśpiečać vykanańnie piacihadovaj prahramy sacyjalna-ekanamičnaha raźvićcia krainy na 2006—2010 hady.

U pryvatnaści, pryrost VUP pavinien skłaści nie mienš čym 11%, inflacyja — u miežach 8—10%.

• 0
• 0
• 0
• 0
• 0
• 0
• 0
• 0