U Minskim rajonie adno z samych papularnych miescaŭ adpačynku — Minskaje mora, abo Zasłaŭskaje vadaschovišča. Stupień jaho hatoŭnaści acaniŭ u čaćvier staršynia Minskaha abłvykankama Alaksandr Turčyn. Razam ź ministram unutranych spraŭ Ivanam Kubrakovym i meram Minska Uładzimiram Kucharavym jon naviedaŭ plaž №5 — adzin z samych papularnych piasčanych plažaŭ Zasłaŭskaha vadaschovišča.
Miesca sustrečy — ekałahičnaja ściežka, jakaja pačynajecca kala aŭtobusnaha prypynku i viadzie akurat da plaža №5 Zasłaŭskaha vadaschovišča, piša «Minskaja praŭda».
Letaś Minskaja abłasnaja Dziaržaŭtainśpiekcyja i «Minskaja lesaparkavaja haspadarka» stvaryli hetuju lasnuju ściežku praciahłaściu 600 mietraŭ. U samym jaje pačatku ŭstanavili dekaratyŭnuju šyldu — zručny aryjencir dla naviedvalnikaŭ plaža.
— U tych, chto dabirajecca da piataha plaža na aŭtobusie, prablem nie ŭźnikaje. Jość dobraŭparadkavanaja ściežka, dla vyhodaŭ adpačyvalnikaŭ — łaŭki. Plaž №5 — samy modny. Siudy jeduć žychary Minska, najbližejšych rajonaŭ. U pikavy pieryjad pryjazdžaje kala 2600 mašyn, tady jak isnyja stajanki raźličany amal na 1000 miescaŭ. Parkoŭki zapaŭniajucca i ŭźnikaje zator, jaki ciahniecca da Ždanovičaŭ, — uvioŭ u kurs spravy načalnik UUS Minabłvykankama Alaksandr Astrejka.
Rašeńnie prablemy jość: u pikavy pieryjad adkryvać dla vyjezdu mašyn technałahičny prajezd, jaki idzie paralelna ekaściežcy. A daroha, jakaja viadzie da plaža, na hety čas budzie adnabakovaj.
— Ale heta tolki ŭ pieryjad napłyvu adpačyvalnikaŭ. U zvyčajnyja dni technałahičnuju darohu zakryjuć na šłahbaum. A daroha da plaža budzie dvuchbakovaj, — udakładniŭ Alaksandr Astrejka.
Na kaniec leta zapłanavali realizacyju jašče adnaho prajekta — budaŭnictva vialikaha razvarotnaha kalca i ŭstanoŭka pry ŭjeździe na parkoŭku šłahbauma. Paśla taho jak usie miescy na stajancy zapoŭniacca, šłahbaum dla ŭjezdu zakryjuć. Mašyny buduć parkavacca ŭzdoŭž darohi.
Jak adznačyŭ Alaksandr Turčyn, taksama ŭ płanach budaŭnictva viełaściežki i piešachodnaj ściežki ad kalcavoj darohi praz Ždanovičy. Heta budzie zroblena dla zručnaści biełarusaŭ, jakija karystajucca viełatranspartam.
Alaksandr Turčyn i Ivan Kubrakoŭ aznajomilisia taksama z najnoŭšymi srodkami patrulavańnia plažaŭ. Na ŭzbrajeńni milicyi — drony i elektrasamakaty, zabiaśpiečanyja vohnietušycielem, aptečkaj, vadoj.
Dron i samakaty buduć vykarystoŭvacca dla adsočvańnia situacyi na ŭsich plažach Zasłaŭskaha vadaschovišča.
Kamientary