Kala MKAD pabudujuć novy rajon na 105 tysiač žycharoŭ. Heta jak Navapołack
U Minharvykankamie vyrašyli viarnucca da idei zabudovy novaha kvartała «Zialony Bor» za MKAD. Siońnia źjaviłasia infarmacyja ab hramadskim abmierkavańni novaha detalovaha płana na hetuju terytoryju. Pa płanie pad Minskam moža vyraści ceły horad — ź vialikaj kolkaściu šmatpaviarchovikaŭ, dziciačymi sadami, škołami, paliklinikami i kinateatram, piša realt.by.
Placoŭka pad žyły rajon «Zialony Bor» znachodzicca za kalcavoj darohaj, kala Kałodziščaŭ. Pad novaje žyllovaje budaŭnictva pojduć ziemli byłoha vajskovaha palihona.
Hetuju terytoryju ŭžo daŭno ŭklučyli ŭ skład Partyzanskaha rajona — tak što budučyja žychary buduć minčanami.
Arhanizataram hramadskaha abmierkavańnia vystupaje administracyja Partyzanskaha rajona Minska, zakazčykam — kamitet architektury i horadabudaŭnictva Minharvykankama, raspracoŭščykam — UP «Minskhrada».
Novy horadabudaŭničy prajekt tyčycca terytoryi ŭ 1916 hiektaraŭ. Učastak miažuje ź siadzibnaj zabudovaj u Kałodziščach, «Zialonaj Havańniu», a taksama — lasnymi masivami.
Značnuju častku ziamiel byłoha palihona ciapier zajmajuć drevy i chmyźniaki, taksama tut jość składy i haspadarčyja pabudovy (jany buduć rekanstrujavanyja i zachavany). Pakul što ŭ rajonie niama nijakich mahistralaŭ, a taksama inžyniernaj infrastruktury. Najbližejšyja darohi — MKAD i praśpiekt Niezaležnaści.
Na novych staličnych ziemlach płanujecca arhanizacyja 11 rajonaŭ, abjadnanych ahulnaj łandšaftna-rekreacyjnaj zonaj. U prezientacyi havorycca, što «Zialony Bor» stanie novaj bramaj u Minsk z boku Nacyjanalnaha aeraporta.
U pierśpiektyvie tut zmohuć pražyvać 105 tysiač čałaviek (104 tysiačy — u šmatkvaternych damach, 1 tysiača — u siadzibnym fondzie). Žyłyja damy abiacajuć budavać pa indyvidualnych prajektach.
Ź infrastruktury ŭ «Zialonym Bary» namiečanaje budaŭnictva škoły, adrazu 4 dziciačych sadkoŭ i 5 paliklinik, balnicy, a taksama kinateatra, biblijateki i inšych abjektaŭ.
Prajekt raźbity na 2 etapy. Na pieršym etapie da 2030 hoda pavinny być asvojenyja płanirovačnyja rajony bližej da Kałodziščaŭ i Minska. Žyllovy fond na pieršym etapie składzie 952 tysiačy «kvadrataŭ», a nasielnictva — 36,5 tysiačy čałaviek.
Druhi etap praduhledžvaje raźvićcio terytoryi paśla 2030 hoda. Na hetym etapie pavinny być dabudavanyja ŭsie 11 płanirovačnych rajonaŭ i infrastruktura. Nasielnictva tady moža pavialičycca da 105 tysiač čałaviek.
Hramadskaje abmierkavańnie budzie prachodzić z 22 maja pa 5 červienia.
Prezientacyja prajekta pradstaŭlenaja ŭ elektronnym vyhladzie na sajcie UP «Minskhrada» i na aficyjnym sajcie administracyi Partyzanskaha rajona. Ekspazicyja prajekta taksama budzie vystaŭlenaja ŭ faje budynka administracyi Partyzanskaha rajona.
Kamientary