Pavodle infarmacyi «Lusterka», było pamiłavana dzieviać fihurantaŭ «spravy Tut.by», jakim inkryminavałasia dapamoha va ŭchileńni ad vypłaty padatkaŭ. Raniej jany zajaŭlali chadajnictvy ab vyzvaleńni ad kryminalnaj adkaznaści.
«Dniami ŭ hetaj historyi była pastaŭlena kropka — nas pamiłavali (prašeńnie było padadziena jašče ŭ kancy śniežnia)», — taksama paviedamiŭ na svajoj staroncy ŭ Facebook hiendyrektar Hoster.by Siarhiej Pavališaŭ.
Sutnaść pretenzii pa kryminalnaj spravie suprać TAA «TUT BAJ MIEDYJA» zaklučałasia ŭ tym, što kampanija, zjaŭlajučysia rezidentam Parka vysokich technałohij (PVT), nibyta atrymała vyručku, nie abumoŭlenuju dziejnaściu, dazvolenaj dla rezidentaŭ.
Nahadajem, ranicaj 18 maja 2021 hoda siłaviki ŭvarvalisia ź pieratrusam u hałoŭny ofis Tut.by ŭ Minsku i ŭ rehijanalnyja ofisy ŭ Breście, Homieli, Viciebsku, Mahilovie i Hrodnie, a taksama pa miescy žycharstva niekatorych supracoŭnikaŭ TAA «TUT BAJ MIEDYJA».
Ahułam było zatrymana 15 čałaviek. Siarod ich — hienieralny dyrektar Ludmiła Čekina, hałoŭny buchhałtar Anžeła Asad, hałoŭny inžynier Ała Łapatka, namieśnik hienieralnaha dyrektara Tut.by pa techničnych pytańniach Alaksandr Dajnieka, namieśnik hienieralnaha dyrektara Tut.by pa ahulnych pytańniach Iryna Rybałka, namieśnik hałoŭnaha buchhałtara Maryja Novik, juryskonsult Kaciaryna Tkačenka, eks-juryskonsult Iryna Kaściučenka, mieniedžar prajekta Tam.by Darja Daniłava, mieniedžar Publisher Box Andrej Aŭdziejeŭ, udava zasnavalnika Tut.by Juryja Zisiera Julija Čarniaŭskaja. A taksama supracoŭniki redakcyi: Maryna Zołatava, Volha Łojka i Alena Taŭkačova.
Ciaham hoda častku zatrymanych pa spravie, jakija znachodzilisia ŭ SIZA, vypuskali — im źmianiali mieru strymańnia.
Da pačatku sudovaha pracesu 9 studzienia 2023 hoda za kratami zastavalisia Maryna Zołatava i Ludmiła Čekina.
17 sakavika 2023 hoda sudździa Valancina Ziankievič pryznała Marynu Zołatavu vinavataj pa art. 361 KK (zakliki da dziejańniaŭ, nakiravanych na pryčynieńnie škody nacyjanalnaj biaśpiecy Biełarusi) i art. 130 KK (raspalvańnie varožaści abo varažniečy).
Ludmiłu Čekinu abvinavacili pa troch artykułach: art. 361 (zakliki da dziejańniaŭ, nakiravanych na pryčynieńnie škody nacyjanalnaj biaśpiecy Biełarusi), art. 243 KK (uchileńnie ad vypłaty sum padatkaŭ, zboraŭ), art. 130 KK (raspalvańnie varožaści abo varažniečy).
Abiedźviuch sudździa pryhavaryła da 12 hadoŭ pazbaŭleńnia voli ŭ kałonii ahulnaha režymu. Sprava razhladałasia ŭ zakrytym režymie.
Alenu Taŭkačovu, Volhu Łojka i Kaciarynu Tkačenka abjavili ŭ vyšuk paśla taho, jak jany nie zjavilisia ŭ sud.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary