Abaranić Ukrainu ad rasijskaha impieryjalizmu — heta zadača, rašeńnie jakoj paŭpłyvaje na los usich krain ad Bałtyjskaha da Čornaha mora, miarkuje amierykanski žurnalist, piśmieńnik i daśledčyk hieapalityki Robiert Devid Kapłan.
Ci była b Jeŭropa ŭ miry z pucinskaj Rasijaj, kali b NATA paśla 1989 hoda nie pašyrałasia na ŭschod i Jeŭropa pryznała intaresy Rasii va Ukrainie?
Piśmieńnik i hieapalityk Robiert Kapłan rašuča adkazvaje: «Nie».
Na jaho dumku, kali b krainy byłoha savieckaha błoka ŭ Centralnaj i Uschodniaj Jeŭropie nie ŭstupili ŭ NATA i ES, jany b ciapier byli słabymi dziaržavami. U prykład jon pryvodzić Rumyniju i Małdovu: Rumynija stała mocnaj i stabilnaj dziaržavaj pad parasonam NATA i ES, niahledziačy na spustašeńnie na vychadzie z dyktatury Čaŭšesku, tady jak Małdova siońnia, kraina, nasielenaja tym ža narodam, jakaja 30 hadoŭ tamu była bahaciejšaja za Rumyniju, — heta słabaja kraina, što mahła stać achviaraj Rasii, kali b Adesa nie ŭstajała.
Takim čynam, pamiž Hiermanijaj i Rasijaj siońnia mahło b być niekalki takich «Małdoŭ», na jakija pahladaŭ by Pucin.
«Inšymi słovami, kali b Zachad nie pašyryŭ NATA i ES na ŭschod, my ciapier vajavali b za Polšču, a nie za Ukrainu i Biełaruś, bo spadar Pucin, napeŭna, dychaŭ by ŭ patylicu kožnaj krainie pamiž Bierlinam i Maskvoj», — piša Robiert Kapłan.
«Ukraina daŭno była b pad piatoj Kramla. Niamieččyna jašče bolš schiliłasia b da niejtralitetu, patrabujučy ciesnych adnosin z Rasijaj nie tolki ŭ suviazi z pastaŭkami hazu, ale i kab harantavać biaśpieku svaich miežaŭ z Polščaj i Čechijaj, kali b hetyja krainy nie stali členami NATA i ES i trapili pad upłyŭ Rasii».
Analityk kaža, što siońniašniaja bitva za Ukrainu — heta abarona ŭsiaho «Mižmorja», pojasa demakratyčnych dziaržaŭ ad Estonii na Bałtyjskim da Bałharyi na Čornym mory, ad rasijskaha impieryjalizmu.
Sama kancepcyja «Mižmorja» — heta była ideja pieršaha kiraŭnika znoŭ niezaležnaj Polščy Juzafa Piłsudskaha. Jon ličyŭ, što ŭtvareńnie takoha błoka dziaržaŭ dapamoža paźbiehnuć krainam Centralnaj i Uschodniaj Jeŭropy daminavańnia Hiermanii ci Rasii.
Na dumku Kapłana, Rasija napała na Ukrainu nie tamu, jak śćviardžałasia aficyjna, što adbyvalisia pašyreńni Arhanizacyi Paŭnočnaatłantyčnaj damovy, a z-za «šekśpiraŭskich demanaŭ» Pucina.
Kapłan zhadvaje słovy adnaho rasijskaha miljardera, jaki raskazaŭ pra razmovu ź ministram zamiežnych spraŭ Rasii Siarhiejem Łaŭrovym. Jak tak mahło być, što Pucin pryniaŭ rašeńnie pra vajnu, nie paraiŭšysia ni z kim, navat ź ministram zamiežnych spraŭ. Łaŭroŭ na heta adkazaŭ: u Pucina jość tolki try daradcy: «Ivan Žachlivy, Piotr Pieršy i Kaciaryna Vialikaja».
Jak adznačaje analityk, rašeńnie ab uvarvańni va Ukrainu adlustroŭvała nie kalektyŭnaje myśleńnie rasijskaj elity, a «ŭłasnyja dumki rasijskaha prezidenta». Pieramoha Ukrainy daść Rasii chaj sabie i słaby šaniec źmianicca samoj, piša Kapłan.
Čytajcie jašče:
Ministr abarony Ukrainy Alaksiej Reźnikaŭ ličyć, što vajna skončycca ŭ hetym hodzie
«Rasija nidzie nie zakančvajecca». Ryhor Judzin patłumačyŭ, što vynikaje z hetaj formuły Pucina
Ciapier čytajuć
Ukraina ŭpieršyniu adkazała na rasijskija ataki na składy «Novaj pošty» simietryčnymi ŭdarami pa chabach «Vajłdbieryz». Padmaskoŭny zhareŭ daščentu1010
Kamientary