Lidary najbolš ŭpłyvovych jeŭrapiejskich krain, u tym liku Francyi i Hiermanii, apošnim časam pačali adkryta nazyvać dziejańni Rasii ŭ susiednich krainach impieryjalizmam.
Uvarvańnie rasijskich vojskaŭ va Ukrainu źjaŭlajecca adradžeńniem impieryjalizmu, miarkuje prezident Francyi Emaniuel Makron.
Pa jaho słovach, «toje, što my nazirajem pačynajučy z 24 lutaha, — heta viartańnie da časoŭ impieryjalizmu i kałonij». Francyja adchilaje heta, imkniecca da miru i tamu praciahvaje šukać mahčymaści praciahnuć dyjałoh z Rasijaj, padkreśliŭ kiraŭnik francuzskaj dziaržavy.
Makron taksama adznačyŭ, što sučasny impieryjalizm, nie źjaŭlajučysia ni jeŭrapiejskim, ni zachodnim, «prymaje formu terytaryjalnaha ŭvarvańnia, jaki abapirajecca na hibrydnuju i hłabalizavanuju vajnu, što vykarystoŭvaje ceny na enierharesursy, charčovuju biaśpieku, jadziernuju biaśpieku, dostup da infarmacyi i mihracyju nasielnictva ŭ jakaści zbroi padziełu i źniščeńnia».
Vajna zakranaje suvierenitet ŭsich krain, zajaviŭ prezident Francyi, vystupajučy ŭ Ńju-Jorku na Hienieralnaj Asamblei AAN.
Kancler Hiermanii Ołaf Šolc abvinavaciŭ prezidenta Rasii Uładzimira Pucina ŭ impieryjalistyčnych pamknieńniach, vystupajučy ŭ Ńju-Jorku na Hienasamblei.
Pa słovach Šolca, «zachopnickaja vajna Rasii suprać Ukrainy ničym nie apraŭdanaja. Prezident Pucin viadzie jaje z adnoj adzinaj metaj — zavałodać Ukrainaj», nie ličačysia z takimi kaštoŭnaściami, jak «samavyznačeńnie i palityčnaja niezaležnaść».
«Dla hetaha isnuje tolki adno słova: nieprykryty impieryjalizm», — padkreśliŭ kancler.
Šolc pakazaŭ, što dziaržavy-členy AAN nie mohuć dazvolić sabie «siadzieć skłaŭšy ruki, pakul uzbrojenaja da zuboŭ jadziernaja dziaržava, — jakaja, da taho ž, jašče i ličycca siarod zasnavalnikaŭ Abjadnanych Nacyj, — žadaje rassunuć miežy hvałtu». Jon zaklikaŭ mižnarodnuju supolnaść stać na abaronu metaŭ i bazavych pałažeńniaŭ Statuta AAN.
Źviartajučysia da ŭdzielnikaŭ Hienasamblei AAN, Ołaf Šolc zaklikaŭ ich nie dapuścić, kab Rasija pieramahła ŭ vajnie suprać Ukrainy.
Mižnarodnaja supolnaść nie moža pryniać mirnaje pahadnieńnie na ŭmovach, jakija dyktuje Rasija, upeŭnieny kancler Hiermanii. «Mienavita pa hetaj pryčynie Ukraina pavinna być zdolnaj adbić napad Rasii. My padtrymlivajem Ukrainu ŭ hetym usimi našymi siłami: finansava, ekanamična, humanitarna, a taksama zbrojaj», — zapeŭniŭ kiraŭnik Hiermanii.
Heta davoli rezkaja rytoryka dla lidaraŭ jeŭrapiejskich dziaržaŭ, jakoj jany raniej paźbiahali. Chacia ŭ impieryjaliźmie rasijskija ŭłady raniej abvinavačvali ŭkrainskija palityki i niekatoryja zachodnija intelektuały.
«Pucin zryvaje ź siabie šmat masak — toje, što jon pakazvaje davoli paśladoŭna, — heta novyja impierskija ambicyi Rasiei», — skazaŭ Rory Finin, dacent ukrainaznaŭstva Kiembrydžskaha ŭniviersiteta.
«Vajna Rasii suprać Ukrainy ciapier vidavočna vajna za impierskaje zavajavańnie», — dadaŭ jon.
Nahadajem, jak tolki Pucin staŭ prezidentam u 2000 hodzie, Kreml u adnosinach z Ukrainaj i Biełaruśsiu pastupova pačaŭ viartacca da nacyjanalistyčnaj rytoryki, impieryjalizmu, jaki admaŭlaje isnavańnie ukrainskaha i biełaruskaha narodaŭ.
U vačach Kramla Ukraina i Biełaruś — heta «ruskaja ziamla», a ŭkraincy i biełarusy — haliny ahulnaruskaj nacyi.
Pucin razhladaje svaju histaryčnuju misiju jak «źbiralnika ruskich ziemlaŭ». Pieršaj terytoryjaj, jakuju «sabrali», byŭ Krym u 2014 hodzie. U Biełarusi ŭstanoŭleny całkam łajalny da Kramla palityčny režym. Ukraina — častka «ruskich ziamiel», jakija Pucin imkniecca «sabrać».
Apošnija hady hety impieryjalizm tolki ŭzmacniaŭsia, pa miery taho jak Pucin usio bolš abmiažoŭvaŭ rasijskuju hramadzianskuju supolnaść, niezaležnyja ŚMI i sadžaŭ u turmu lidaraŭ apazicyi.
U pramovie ab pryznańni niezaležnaści «DNR» i «ŁNR» Pucin uvieś čas kiravaŭsia psieŭdahistaryčnymi arhumientami i śćviardžeńniami, što Ukraina, nibyta, heta ŭsiaho tolki pabočny pradukt rasijskaj historyi.
«Z daŭnich časoŭ ludzi, jakija žyvuć na paŭdniovym zachadzie histaryčna ruskaj ziamli, nazyvali siabie ruskimi i pravasłaŭnymi», — havaryŭ tady Pucin.
«Sučasnaja Ukraina była całkam stvorana Rasijaj, ci, kali być bolš dakładnym, balšavickaj, kamunistyčnaj Rasijaj», — śćviardžaŭ kiraŭnik Rasii.
Toje, što zachodnija lidary adkryta stali nazyvać Pucina impieryjalistam, śviedčyć pra ŭśviedamleńnie imi, što z Kramlom damovicca niemahčyma. Usim stała zrazumieła, što vajna va Ukrainie nijakim čynam nie była źviazana z pašyreńniem NATA abo «denacyfikacyjaj», heta była prosta sproba zachapić inšuju krainu.
Ciapier čytajuć
Učora Minsk znoŭ zatapiła. Čamu stalica nie hatovaja da daždžoŭ?4
Kamientary