«Usich zabjom, kaho treba, abrabujem. Z Boham». Chto taki Uładlen Tatarski, jakoha padarvali ŭ picierskaj kaviarni
Prapahandyst vajny Uładlen Tatarski, jakoha zabili padčas jaho tvorčaha viečara ŭ kaviarni Sankt-Pieciarburha, — były kryminalnik, rabaŭnik. Hety vajenkar vyznačaŭsia navat na fonie ahałciełaj rasijskaj prapahandy.
Uładlen Tatarski — heta psieŭdanim rasijskaha błohiera z bataljona «Uschod» i vajennaha karespandenta Maksima Famina, jaki ŭsłaŭlaŭ ahresiju Rasii suprać Ukrainy.
Jon zapisvaŭ videaroliki z «analizam» vajny i davaŭ parady mabilizavanym rasijanam. Byŭ siarod zaprošanych na vystupleńnie Pucina z nahody dałučeńnia Łuhanskaj, Danieckaj, Chiersonskaj i Zaparožskaj abłaściej.
U adnym z rolikaŭ, zapisanym letaś u vieraśni, akurat paśla taho pucinskaha vystupleńnia, jon zajaviŭ, što «ŭsich pieramožam, usich zabjom, usich, kaho treba, abrabujem, i ŭsio budzie, jak my lubim, z Boham».
A ŭčora vajenkar nie chavaŭ radaści ad paviedamleńnia ab śmierci biełaruskaha dobraachvotnika.
Tatarskamu było 40 hadoŭ. Pa jaho słovach, naradziŭsia jon i ŭsio žyćcio pražyŭ u Makiejeŭcy, na Danbasie. Havaryŭ, što jaho baćka — «ruski patryjot, zvyčajny šachcior» i vychoŭvaŭ jaho ŭ patryjatyčnym duchu. Jon u dziacinstvie rabiŭ «drobnyja dysidenckija vychadki na ŭrokach ukrainskaj movy».
Tatarski kazaŭ, što zajmaŭsia biznesam, pakul jaho nie pasadzili za rabavańnie banka. U 2014 hodzie ŭciok z turmy i dałučyŭsia da prarasijskaha apałčeńnia.
Potym jaho znoŭ pasadzili, bo jurydyčnych padstaŭ dla vyzvaleńnia nie było. Potym jon byŭ pamiłavany i adsłužyŭ pa kantrakcie. U 2019-m zvolniŭsia i zaniaŭsia błohierskaj dziejnaściu, pajechaŭ pracavać u Maskvu. Kali pačałasia poŭnamaštabnaja vajna, staŭ jaje apiavać.
Pra svaje ŭcioki z turmy napisaŭ knihu, jakuju vydaŭ, kali žyŭ u Maskvie. Niadaŭna vyjšła jašče adna jaho kniha — zbornik apaviadańniaŭ «Miedytacyja».
Tatarski ličyŭ, što «Ukraina jak dziaržava ŭ ciapierašnim vyhladzie pavinna być źniščana».
«Jakomu narmalnamu čałavieku z Ukrainy, kali jon pierajechaŭ u RF zachočacca vučyć ŭkrainskuju movu? I hałoŭnaje: dla čaho? Čytać Šaŭčenku ŭ aryhinale? Heta śmiešna ž. Vyvučać (nie havaryć na suržyku, a mienavita vyvučać ŭkrainskuju movu) zachočuć tolki jašče nie vyjaŭlenyja FSB ahienty HUR i SBU», — pisaŭ Tatarski.
Vajenkar pryznavaŭsia, što nie čakaŭ ad Ukrainy supracivu. Ën zaklikaŭ da biaźlitasnych bambiožak.
«Kali b my ŭ pieršy dzień pachavali ŭ kazarmach Ukrainy 10 tysiač ukrainskich sałdat, to jany byli b na pieramovach zhavorlivymi, heta b demaralizavała macniej», — zajaŭlaŭ Tatarski ŭ adnym ź intervju.
Uładlena Tatarskaha zabiła 2 krasavika vybucham ŭ kafe Street Food Bar №1 u Sankt-Pieciarburhu. Tam jon vystupaŭ ź lekcyjaj pra toje, jak «vieści repartažy z haračych punktaŭ» i «što takoje być vajenkaram».
Sustreča z Tatarskim była arhanizavanaja dyskusijnym kłubam «Kibier Front Z». U lipieni 2022 hoda uładalnik PVK «Vahnier» Jaŭhien Pryhožyn kazaŭ, što Street Food Bar №1 naležyć jaho kampanii «Kankord».
Ciapier čytajuć
Što ŭjaŭlaje saboj baza danych, jakuju siłaviki nazyvajuć «uzłomam «Novaj Biełarusi»8
Kamientary