MAK vystupiŭ za dopusk biełarusaŭ na spabornictvy pad niejtralnym ściaham, ale tolki ŭ indyvidualnych vidach sportu
Biełaruskija i rasijskija spartsmieny mohuć udzielničać u mižnarodnych spabornictvach pad niejtralnym ściaham i tolki ŭ indyvidualnych turnirach. Udzieł spartsmienaŭ z hetych krain u kamandnych vidach sportu nie razhladajecca, zajaviŭ na pres-kanfierencyi 28 sakavika prezident Mižnarodnaha alimpijskaha kamiteta Tomas Bach.
«Siońnia vykanaŭčy kamitet MAK vypuskaje mižnarodnym fiederacyjam i arhanizataram mižnarodnych spartyŭnych spabornictvaŭ nastupnyja rekamiendacyi:
pa-pieršaje, atlety z rasijskimi ci biełaruskimi pašpartami pavinny vystupać tolki ŭ jakaści indyvidualnych spartsmienaŭ. Pa — druhoje, spartsmieny z rasijskimi ci biełaruskimi pašpartami ŭ kamandnych vidach sportu nie mohuć razhladacca», — zajaviŭ Bach.
MAK taksama rekamiendavaŭ dapuścić da ŭdziełu ŭ spabornictvach u niejtralnym statusie spartsmienaŭ ź Biełarusi, jakija nie padtrymlivajuć vajnu va Ukrainie. Udzieł biełaruskich i rasijskich spartsmienaŭ u Alimpijadzie 2024 hoda ŭ Paryžy na pasiadžeńni vykankama nie abmiarkoŭvaŭsia.
Taksama Bach u svaim vystupleńni padkreśliŭ, što ŭdzielničać u mižnarodnych spabornictvach nie mohuć spartsmieny, jakija niejkim čynam źviazanyja z rasijskimi i biełaruskimi ŭzbrojenymi siłami ci nacyjanalnymi strukturami. Atlety taksama pavinny adpaviadać usim antydopinhavym rekamiendacyjam.
MAK taksama pakinuŭ u sile rekamiendacyju pa zabaronie na praviadzieńnie mižnarodnych spabornictvaŭ na terytoryi Biełarusi i Rasii; zabaronu na vykarystańnie ściahoŭ, himnaŭ, kvietak abo lubych inšych apaznavalnych znakaŭ Biełarusi i Rasii padčas praviadzieńnia spartyŭnych mierapryjemstvaŭ, a taksama zabaronu na akredytacyju spartyŭnych funkcyjanieraŭ ź Biełarusi i Rasii na spabornictvy.
Mnohija zachodnija krainy kateharyčna nie padtrymlivajuć luby ŭdzieł u spabornictvach usich rasijskich i biełaruskich spartsmienaŭ. Tolki siońnia bolš za 300 fiechtavalščykaŭ źviarnulisia z adkrytym listom u MAK z prośbaj nie dapuskać rasijan.
Tomas Bach, adnak, zajaviŭ, što pradstaŭniki Rasii i ciapier udzielničajuć u niekatorych spabornictvach (tenis, nastolny tenis, viełasport) — i heta jašče, maŭlaŭ, ni razu nie pryvodziła da prablem ź biaśpiekaj: «My nie možam znajści rašeńnie, jakoje zadavalniała b usich. Z hetym nam, mahčyma, pryjdziecca žyć», — adznačyŭ Bach.
Kiraŭnik MAK Tomas Bach — za dostup spartsmienaŭ ź Biełarusi i Rasii da Alimpijskich hulniaŭ-2024 u Paryžy
Ukraina, Polšča i krainy Bałtyi źviarnulisia da MAK z zaklikam nie davać palohki rasijskim i biełaruskim spartsmienam
UEFA razhledzić pytańnie vyklučeńnia biełaruskaha futboła ź mižnarodnych spabornictvaŭ
Ciapier čytajuć
«Sojevyja ekstremisty pavinny adpracavać misku kłubnic». Skardziŭsia na ŭmovy pracy ŭ KDB, a ciapier uciuchvaje treninhi siłavikam — chto taki Anton Šabunievič1919
Kamientary