«Nam zastaniecca tolki pradać dom i zjechać adsiul». Adkidy staličnaj kanalizacyi sabralisia vazić pad Maładziečna. Miascovyja suprać

Kali sažałku pabudujuć i jana pačnie funkcyjanavać, to pad Krasnaje sa stalicy štodzień buduć pryvozić i vyhružać u były karjer kala 50 samazvałaŭ kanalizacyjnych adkidaŭ.

Na sajcie Maładziečanskaha rajvykankama abvieščana ab praviadzieńni hramadskich abmierkavańniaŭ spravazdačy Instytuta pryrodakarystańnia Nacyjanalnaj akademii navuk Biełarusi ab acency ŭździejańnia sažałki-nakaplalnika na navakolnaje asiarodździe.

Zakazčyk budaŭnictva sažałki-nakaplalnika — UP «Minskvodakanał». Inžynier pradpryjemstva Śviatłana Vieramiejka patłumačyła Kraj.by, jakija mienavita adkidy płanujuć składavać kala Krasnaha:

— Heta suchija abiazvodžanyja adkidy žyćciadziejnaści čałavieka, jakija buduć vyvozicca ź Minskaj ačyščalnaj stancyi. Pry vybary miesca zachoŭvańnia adkidaŭ razhladałasia niekalki varyjantaŭ. Miesca pad Maładziečnam abrana tamu, što były karjer, dzie budzie raźmieščana sažałka, akružany lesam, jaki pieraškodzić vietru raznosić niepryjemnyja pachi.

Pavodle jaje, usie ekałahičnyja normy vykananyja.

Miesca budučaj sažałki znachodzicca za dva kiłamietry na paŭnočny zachad ad Ivoncavičaŭ, za 16 kiłamietraŭ na paŭdniovy ŭschod ad Maładziečna. Aryjencirovačna płošča składaje 17 hiektaraŭ. Pačatak realizacyi prajektnych rašeńniaŭ — 2024 hod.

Umiaščalnaść sažałki-nakaplalnika składzie paŭtara miljona kubičnych mietraŭ. Pa danych vytvorčaści pradpryjemstva «Minskačystvod», sutačny vyvaz adkidaŭ z ačyščalnych stancyj — 550 kubičnych mietraŭ. Za hod — 200 tysiač kubičnych mietraŭ. Pieryjad ekspłuatacyi sažałki-nakaplalnika składaje vosiem hadoŭ.

To-bok, padličyła vydańnie, za sutki ź Minska pad Maładziečna moža pryjazdžać kala 50 MAZaŭ z suchimi kanalizacyjnymi adkidami.

Zaraz ludzi pačali źbirać podpisy suprać budaŭnictva schovišča.

Lidzija žyvie ŭ Krasnym. Jana paviedamiła vydańniu, što podpisy suprać budaŭnictva schovišča adkidaŭ źbirajuć u jaje vioscy i ŭ pasiołku Čyść.

— Maja siamja žyvie na ŭskrainie Krasnaha. Naš dom prykładna za dva kiłamietry ad miesca zapłanavanaha budaŭnictva schovišča adkidaŭ, — kaža Lidzija. — U nas z mužam troje dziaciej. Synam 7, 9 i 14 hadoŭ. Viadoma, nam nie ŭsio adno, čym my budziem dychać i jakuju vadu pić. Prytym ab płanach abstalavać tut kanalizacyjny śmietnik nas nichto jak maje być nie apaviaściŭ. Daviedalisia pra heta ŭ internecie z čataŭ Čyści i Krasnaha.

Andrej, muž Lidzii, kaža:

— Kali schovišča budzie pabudavana, nam zastaniecca tolki pradać dom i zjechać adsiul. U spravazdačy ab acency ŭździejańnia sažałki-nakaplalnika na navakolnaje asiarodździe havorycca, što najbližejšaja vodazabornaja śvidravina znachodzicca bolš čym za dva kiłamietry ad učastka budučaj sažałki, ale heta nie tak. Pa karcie možna vyznačyć, što najbližejšyja vodazabory sadoŭnickich tavarystvaŭ raźmieščany na adlehłaści kala 800 mietraŭ. Žychary Čyści navat skłali dakumient, jaki dakazvaje, što daśledavańni praviedzieny niekarektna.

Data pačatku hramadskich abmierkavańniaŭ — 4 sakavika. Data zakančeńnia — 3 krasavika.

• 4
• 0
• 4
• 14
• 7
• 10
• 59
• 0