«Bajpoł» raskazaŭ, čym padryvali samalot u Mačuliščach i što ŭ im moža być paškodžana
U telehram-kanale «Bajpoła» vykładziena padrabiaznaja infarmacyja pra toje, jakaja vybuchoŭka vykarystoŭvałasia padčas dyviersii ŭ Mačuliščach 26 lutaha i jakija vyniki heta mahło mieć dla samalota. Z hetaha paviedamleńnia možna zrazumieć, prynamsi, toje, na jakija vyniki apieracyi raźličvali sami jaje vykanaŭcy.
Pavodle «Bajpoła», udzielnikami płana «Pieramoha» pry ździajśnieńni akcyi byli vykarystanyja dva drony vytvorčaści kampanii DJI, pieraabstalavanyja ŭ drony-kamikadze samatužnym sposabam.
Kožny dron nios zarad 200 hram vybuchovaha rečyva ŭ traciłavym ekvivalencie. U jakaści paražajučaha elemienta vykarystany mietaličnyja šary z prykładnaj kolkaściu 200 št. na kožny.
Zychodziačy z apublikavanych spadarožnikavych zdymkaŭ možna mierkavać, što majucca dva miescy paškodžańnia.
Pieršaje — paškodžany klučavy elemient, trochkaardynatnaja radyjołakacyjnaja stancyja, a mienavita łakatar. Druhoje — vidać paškodžańnie ŭ rajonie raźmiaščeńnia abciakalnika anteny spadarožnikavaj radyjolinii ŭ piaredniaj častcy, pablizu nasavoha adsieka.
Nakolki hetyja paškodžańni mohuć być surjoznyja? Kali paškodžany łakatar, to antenu pryjdziecca mianiać całkam z poŭnaj jaje razborkaj i demantažom. A akramia anteny łakatara pad abciakalnikam pavinna jašče znachodzicca antena sistemy raspaznavańnia «svoj-čužy».
Abstalavańnie takoha typu, śćviardžaje «Bajpoł» — darahi adzinkavy pradukt, jaki vyrablajecca na asnovie papiaredniaj zamovy.
Nie varta niedaaceńvać i takija faktary paražeńnia, jak uździejańnie ahniu i ŭdarnaj chvali, jakaja pryvodzić da defarmacyi albo zrušeńnia elemientaŭ łakatara.
Stalovyja šaryki ŭ chodzie vybuchu pavinny byli prabicca na davoli vialikuju hłybiniu ŭ adnosna tonkuju abałonku korpusa samalota i paškodzić pravodku dy ZVČ-abstalavańnie — RŁS i stancyju spadarožnikavaj suviazi, jakija raźmiaščajucca, jak praviła, pablizu anten dla paźbiahańnia vialikich strat enierhii ŭ ZVČ-chvalavodach.
Akramia taho, pad abšyŭkaj borta samalota, uzdoŭž korpusa ciahnucca sažhutavanyja pravady. I mienavita ŭ takim samalocie z-za najaŭnaści vialikaj kolkaści abstalavańnia kabielaŭ roznaha typu i pryznačeńnia — kiłamietry. Stalovyja paražajučyja elemienty mahli nie tolki razarvać draty, ale razam z ahniom i apłavić ich.
Pakul što nieviadoma, ci daviałosia tušyć pažar i jakoj sumieśsiu.
Ale akurat vysokaja tempieratura i reakcyja na srodki pažaratušeńnia taksama mahli pasłužyć pryčynaj źmieny koleru kryłaŭ i inšych elemientaŭ, što vidać na spadarožnikavych zdymkach.
Kali tušeńnie rabiłasia, to vysokaja imaviernaść traplańnia srodkaŭ pažaratušeńnia ŭ razburanyja miescy, a heta pryvodzić da akiśleńnia ŭnutranaj častki ZVČ-chvalavodaŭ, pakrytych mietałam z vysokaj pravodnaściu, jakim źjaŭlajecca srebra. Vysokaja enierhija sihnału łakacyjnych stancyj u miescach karozii vyklikaje praharańnie hetaha pakryćcia. U vyniku heta moža vyklikać vychad sa stroju samoj radyjołakacyjnaj sistemy.
Adnaŭleńnie apisanych vyšej vierahodnych paškodžańniaŭ patrabuje najaŭnaści nie adnoj ramontnaj bryhady, a kalektyvaŭ śpiecyjalistaŭ, jakija pracujuć u svaich vuzkich napramkach.
Pry hetym patrabujecca najaŭnaść ramontnych i vyprabavalnych stendaŭ. Zrabić taki ramont mahčyma tolki na płoščach pradpryjemstva, jakoje vykonvała madernizacyju kompleksu.
Ciapier čytajuć
U internet źlili pierapisku Kavaleŭskaha i Cichanoŭskaj. Ale kancoŭ nie znajści31
Kamientary