Amierykanski instytut vyvučeńnia vajny (ISW) u čarhovaj zvodcy-analizie adznačaje, što Uładzimir Pucin u apošnich publičnych vystupach znoŭ sprabavaŭ abialić svoj vobraz u vačach rasijanaŭ, pierakłaŭšy adkaznaść za niaŭdačy ŭ vajnie na inšych.
Analityki ISW nahadvajuć, što Pucin apošnim časam zrabiŭ niekalki zajaŭ pra toje, što Rasija byccam by choča jak maha chutčej skončyć vajnu, a z druhoha boku, što nie žadaje intensifikavać bajavyja dziejańni, kab nie pavialičvać kolkaść achviar.
«Abodva hetyja śćviardžeńni źjaŭlajucca častkaj skaardynavanaj kampanii Kramla dla apraŭdańnia darahoj pucinskaj vajny ŭ vačach unutranaj aŭdytoryi, jakaja prynosić usio bolš surjoznyja achviary dziela dasiahnieńnia nierealistyčnych metaŭ Kramla. Rasiejskija vajskoŭcy nie atrymlivali istotnych pieramoh z 3 lipienia, z padzieńnia Lisičanska», — piša ISW.
Analityki instytuta miarkujuć, što adzin z tych, na kaho Pucin zvalvaje vinu za niaŭdačy — načalnik hienštaba Valeryj Hierasimaŭ, jaki napiaredadni ŭpieršyniu paśla doŭhaha pierapynku źjaviŭsia na ekranach u samastojnaj roli.
Hierasimaŭ vystupiŭ pierad zamiežnymi vajskovymi ataše i, jak pišuć aŭtary zvodki, prasoŭvaŭ usio tyja ž nie adpaviednyja realnaści apraŭdańni vajny: «nieanacyzm» va Ukrainie i «padrychtoŭka Kijeva da napadu na Danbas i Krym».
«Kreml ustrymlivaŭsia ad taho, kab pakazvać Hierasimava publicy, amal dziesiać miesiacaŭ, da 17 śniežnia, a ciapier, kali chutka pojdzie ŭžo druhi hod vajny, vierahodna, sprabuje znoŭ uvieści jaho [u publičnuju prastoru] u jakaści čarhovaj fihury, adkaznaj za hetuju vajnu», — miarkujuć analityki Instytuta vyvučeńnia vajny.
Kamientary