Pry pieratrusach u Kijeva-Piačerskaj łaŭry znajšli prarasijskuju litaraturu, ludziej z pašpartami SSSR i 100 tysiač dalaraŭ
Słužba biaśpieki Ukrainy paviedamiła ab zaviaršeńni śledčych dziejańniaŭ na terytoryjach Śviata-Uśpienskaj Kijeva-Piačerskaj łaŭry ŭ Kijevie, Kareckaha Śviata-Trajeckaha manastyra i ŭ pamiaškańniach Sarnienska-Paleskaj jeparchii UPC u Rovienskaj vobłaści.
Jak zajaviła viedamstva, na terytoryi chramaŭ vyjavili ludziej biez dakumientaŭ, hramadzian Rasii, a taksama bolš za 2 młn hryŭniaŭ, bolš za 100 tysiač dalaraŭ ZŠA i niekalki tysiač rasijskich rubloŭ.
Akramia taho, u chodzie vobšukaŭ śledčyja znajšli prarasijskuju litaraturu, što vykarystoŭvałasia pry navučańni ŭ sieminaryjach i prychodskich škołach, u tym liku dla prapahandy idej «ruskaha śvietu», zajaviła SBU.
Niekatoryja z vyjaŭlenych u manastyrach ludziej pakazvali pašparty i vajennyja bilety SSSR, abo naohuł nie mieli aryhinałaŭ dakumientaŭ, a tolki ich kopii, abo mieli pašparty hramadzian Ukrainy z prykmietami padrobki ci paškodžańnia. Bolš za 50 čałaviek prajšli pravierku na palihrafie.
Kijeva-Piačerskaja łaŭra znachodzicca ŭ padparadkavańni Ukrainskaj pravasłaŭnaj carkvy (UPC, da niadaŭniaha času častki Maskoŭskaha patryjarchata). Paśla pačatku rasijskaha ŭvarvańnia źjaŭlalisia paviedamleńni ab tym, što śviatary UPC MP sadziejničali rasijskim akupacyjnym vojskam i viali prapahandu «ruskaha śvietu».
U rasijskim MZS hnieŭna adreahavali na praviadzieńnie pieratrusaŭ u łaŭry.
«Heta ž prosta niejkaja tatalnaja biazbožnaja vakchanalija, — zajaviła aficyjny pradstaŭnik ministerstva Maryja Zacharava. — Hetamu niama ni apraŭdańnia, ni tłumačeńnia». Taki ŭčynak układvajecca ŭ łohiku dziejańniaŭ kijeŭskaha režymu, dadała jana.
Kamientary