Kudy schadzić: šalony hajd pa sučasnym mastactvie i jašče 8 kłasnych iventaŭ dla amataraŭ kino
Na kinafiestyvali «Paŭnočnaje źziańnie», jaki ŭžo startavaŭ, možna nie tolki biaspłatna pahladzieć kino sa Skandynavii, Bałtyi, Biełarusi i Ukrainy, ale i paŭdzielničać u iventach. Raskazvajem, što cikavaha projdzie na hetym i nastupnym tydni. Jość varyjanty afłajn i anłajn.
Ci buduć prachodzić iventy offline?
Tak. U Talinie projdzie śpiecyjalnaja panelnaja dyskusija «Jak doma», stvoranaja ŭ kałabaracyi z Talinskim kinafiestyvalem «Ciomnyja nočy».
Paśla revalucyi 2020 hoda i žorstkich represij u Biełarusi tysiačy ludziej byli vymušanyja pakinuć svaje damy i pačać žyćcio nanova. Ciapier niezaležnyja biełaruskija kiniematahrafisty žyvuć pa ŭsim śviecie, ale nie mohuć viarnucca na radzimu i zdymać kino ŭ svajoj krainie. Jak salidaryzavać supolnaść u vyhnańni i znajści resursy i miechanizmy, kab ruchacca dalej u žyćci i kino? Vyvučajem na prykładzie biełaruskaha, estonskaha i mižnarodnaha dośviedu.
Kali? 24 listapada, 17:00 (talinski čas).
Dzie? U Nordic Hotel Forum, Capella room.
Mova iventa: anhlijskaja.
Uvachod: pa akredytacyi PÖFF abo pa rehistracyi tut.
Jakija mierapryjemstvy možna budzie naviedać online?
22 listapada, 19:00
«Šalony hajd pa sučasnym mastactvie»
Hutarka pra mastactva i ekśpierymienty nad śviadomaściu z bratami Łaŭrysam i Rajcisam Abiele, jakija zrežysiravali turbulentny paŭimpravizacyjny film-pierformans u duchu Haspara Noe — «Niespakojnyja rozumy». Z bratami Abiele pahavoryć biełaruskaja art-kuratarka Hanna Karpienka.
23 listapada, 19:00
«Karotki kurs pa dekałanizacyi»
Panelnaja dyskusija źbiare online prahramnych dyrektaraŭ bujnych mižnarodnych kinafiestyvalaŭ, a taksama krytykaŭ dy filmmejkieraŭ ź Litvy, Łatvii, Polščy, Ukrainy, Biełarusi. Jany parazvažajuć pra toje, jak ciapier vyhladaje praces adboru filmaŭ i jak mižnarodnyja kinafiestyvali, składajučy svaje prahramy, dekałanizujuć rehijon Uschodniaj Jeŭropy, kudy ŭvachodzić i Biełaruś. Siarod haściej Alhirdas Ramaška, Ihar Sukmanaŭ, Elina Rejtere, Alaksiej Radynski, Chelejen Hierytsan.
Mova iventa: anhlijskaja.
24 listapada, 15:00
«Nindzia, jaki raźbivaje stereatypy»
Inhvil Sve Flikie źniała kino, jakoje adnačasova pašyraje ŭjaŭleńnie pra žanočaha piersanaža ŭ kino i pry hetym vyklikaje ščyry śmiech. «Dzicionak-nindzia» razburaje tabu, lohka dy iranična razmaŭlajučy na ŭraźlivyja temy niepažadanaj ciažarnaści, čajłd-fry i abortaŭ. Sumlennaja razmova z režysiorkaj pra toje, jak zdymać kamiedyju na tabujavanuju temu. Pra heta režysiorka raskaža ŭ razmovie z narviežskim akcioram i mastackim kiraŭnikom talinskaha teatra Vaba Lava Charaldam Tompsanam Rozenstromam. Da hutarki dałučycca vykanaŭca hałoŭnaj roli, akciorka Kryścin Kujat Torp, jakaja padzielicca, ci blizkija joj prablemy jaje hieraini.
25 listapada, 16:00
Razmova pavodle prahramy Ukraine Mon Amour, u jakoj paŭdzielničajuć Symon Lerenh Vilmont, kinarežysior, aŭtar filma «Dom z askiepkaŭ» (Danija), Volha Žurba, kinarežysiorka, aŭtarka filma «Zvonku» (Ukraina), Tania Reut, teležurnalistka i viadoŭca (Biełaruś/Irłandyja).
26 listapada, 19:00
Dyskusija pra huk u kino jak asobny śviet — pavodle filma «Ślapy, jaki nie chacieŭ hladzieć 'Tytanik'», u jakim stvaralnikam treba było pieradać hukavuju karcinu śvietu nieviduščaha čałavieka. Dla hetaha jany kansultavalisia z vykanaŭcam hałoŭnaj roli, jaki straciŭ zrok u vyniku chvaroby. Na ivencie biełaruski hukarežysior i vykładčyk Dźmitryj Natalevič i hukarežysior kino i muzyčny supiervajzier z Danii Piter Albrechtsan pahavorać pra toje, jak z dapamohaj huku pieradać źmienu ŭnutranaha stanu i taktylnyja adčuvańni hieroja, a taksama pryadkryjuć tajamnicy, jak stvarajucca foli i miks filma i čamu heta sapraŭdnaje mastactva.
28 listapada, 19:00
Sierbski pohlad na traŭmatyčnaje minułaje režysiorki Natašy Urban, čyj film «Zaćmieńnie» ŭvajšoŭ u mižnarodnuju prahramu «Paŭnočnaha źziańnia». Dźvie vybitnyja sierbskija žančyny, režysiorka Nataša Urban i ekśpiertka ŭ kulturnaj palitycy, prafiesarka Milena Drahičevič-Šešyč, abmiarkujuć film i pahavorać pra važnaść uspaminaŭ, navat kali jany balučyja.
29 listapada, 16:00
Dyskusija «Jak doma. Vykliki emihracyi»
Niezaležnaje biełaruskaje kino: dzie my, chto my, kudy my idziom? Padčas online-dyskusii aŭtary stužak (Dzima Dziadok, Hanna Saŭčanka, Mikita Łaŭrecki, Uładzimir Kazłoŭ), što ŭvajšli ŭ biełaruskuju prahramu «Paŭnočnaha źziańnia», raskažuć, dzie ciapier jany pačuvajucca jak doma i ci ŭdajecca im znachodzić siły dy mahčymaści, kab zdymać kino, salidaryzavacca z kalehami i nie hublać suviaź z hledačom. Maderavać razmovu buduć dyrektarka «Paŭnočnaha źziańnia» Vola Čajkoŭskaja i kulturołah Maksim Žbankoŭ.
30 listapada, 19:00
Režysiorka Ali Chaapasała źniała film pra sučasnych finskich dziaŭčat, pra ich siabroŭstva, kachańnie, seks, traŭmy, pošuk identyčnaści i svajho miesca ŭ śviecie. Stužka adrazu skaryła publiku, atrymaŭšy pryz hladackich simpatyj na kinafiestyvali Sundance, a ci spadabałasia jana samim padletkam? Pra toje, jak stvaralisia vobrazy troch siabrovak i ci nie zaminała režysiorcy roznaść pakaleńniaŭ ź jaje hierainiami, Ali Chaapasała raskaža ŭ razmovie ź piśmieńnicaj Natałkaj Charytaniuk.
Čas mierapryjemstvaŭ abaznačajecca pa minskim časie. Mova iventaŭ: anhlijskaja z paśladoŭnym pierakładam na biełaruskuju ci ź biełaruskimi subcitrami, akramia panelnaj dyskusii offline «Jak doma» i «Karotkaha kursa pa dekałanizacyi», jakija buduć vyklučna na anhlijskaj movie.
Usia prahrama filmaŭ i iventaŭ u online budzie dastupnaja biaspłatna dla ŭsich, chto zarehistrujecca. Padtrymać «Źziańnie» danatami možna tut.
Ciapier čytajuć
«Chavaješ svoj žach, bo heta škilet sa skuraj». Śviatłana Cichanoŭskaja pryznałasia, ci paznała Siarhieja praź piać hadoŭ1
Kamientary