Kolkaść biełarusaŭ, jakija jeździać pa zarobki za miažu, praciahvaje raści. «Naša Niva» pacikaviłasia ŭ biełaruskich hastarbajtaraŭ, jak źmianilisia ich zarobki za apošni čas. Budaŭnik u Polščy ciapier zarablaje 2500 dalaraŭ, mantažnik u Litvie — 2000 jeŭra, a kolki aŭtaślesar u Bielhii i kiroŭca busa ŭ Polščy?
Apieratar na vytvorčaści ŭ Čechii
Čytač, jaki ŭžo čatyry hady jeździć na zarobki ŭ Čechiju i pracuje tam apierataram na vytvorčaści, kaža, što ad pačatku vajny va Ukrainie ŭzrovień apłaty pracy nie źmianiŭsia.
«Jak i raniej, płaciać 140 kron (5,75 jeŭra) za hadzinu. Tamu, kali hladzieć tolki na hetyja ličby, atrymlivajecca, što zarobak zachavaŭsia na tym samym uzroŭni. Ale ŭ pieravodzie na dalary abo jeŭra jon staŭ mienšy. Krona davoli istotna prasieła ŭ samym pačatku vajny, paźniej kurs stabilizavaŭsia, ale ŭsio adno zastaŭsia krychu bolšy, čym da vajny», — kaža čytač.
Mužčyna adznačaje, što pry zachavańni zarpłaty na raniejšym uzroŭni vydatki na žyćcio ŭ Čechii za hety pieryjad značna pavialičylisia.
«Źmianiŭsia košt žyćcia, pavialičylisia vydatki na ježu, kamunalnyja pasłuhi, paliva i h.d. Raniej atrymlivałasia bolš adpraŭlać na radzimu. Ciapier hetaja ličba skaraciłasia na 20—30%», — pryznajecca čytač.
Budaŭniki ŭ Polščy
Inšy mužčyna taksama ŭžo čaćviorty hod pracuje za miažoj. Pracujučy mularam na budoŭli ŭ Polščy, jon zarablaje 2000—2500 dalaraŭ za miesiac u zaležnaści ad abjomu vykananaj raboty.
«U dobrych śpiecyjalistaŭ, jakija pracujuć na budoŭli ŭ Polščy, zarobki pastupova rastuć, — śćviardžaje čytač. — Vajenny pieryjad nie staŭ vyklučeńniem. Za apošnija 9 miesiacaŭ staŭka za mietr vyrasła na 3 złotyja».
Inšy čytač, jaki pracuje ŭ Polščy cieślarom, śćviardžaje, što dzieviać miesiacaŭ tamu zarablaŭ bolš, čym ciapier. Da vajny jon atrymlivaŭ 5200 złotych za miesiac, ciapier 4500 złotych. Pa jaho słovach, bližej da vosieni ŭ ich skaraciŭsia abjom pracy, a razam z tym i zarobki. Aproč hetaha, čytač źviartaje ŭvahu na toje, što za hety čas złoty taksama krychu patańnieŭ adnosna dalara i jeŭra.
Mantažnik i dalnabojščyk u Litvie
Čytač, jaki ź viasny biahučaha hoda pracuje ŭ litoŭskaj firmie mantažnikam, kaža, što za hety pieryjad jaho zarpłata pavysiłasia pryblizna na 10%.
«U pačatku hoda ja atrymlivaŭ 1800 jeŭra, a ciapier 2000. Miarkuju, što rost zarpłaty źviazany z padvyšeńniem taryfaŭ na našu pracu ŭ cełym pa Jeŭrasajuzie», — kaža jon.
Pra rost stavak kaža i kiroŭca-dalnabojščyk, jaki taksama pracuje ŭ litoŭskaj firmie.
«U pačatku hoda płacili pa 70 jeŭra za sutki, ciapier 80. Staŭki pavyšali pastupova, pa 2—5 jeŭra, ale ŭ vyniku vyjšła, što krychu bolš, čym za paŭhoda sutačnyja vyraśli na 10 jeŭra. Navat z ulikam taho, što z-za istotnaj inflacyi vydatki na ježu krychu padraśli, ciapier usio adno atrymlivajecca pryvieźci dadomu troški bolš hrošaj, čym na pačatku hoda», — dzielicca dalnabojščyk.
Vadziciel busa ŭ Polščy
Inšy biełarus, jaki pracuje kiroŭcam u polskaj firmie na busie, taksama kaža, što za hety čas staŭka vyrasła na 10 jeŭra.
«Da vajny za sutki pracy płacili pa 40 jeŭra, u pačatku leta pavysili da 45, u vieraśni dadali jašče piać. Atrymlivajecca, što za hety čas zarobak vyras na 20%. Anałahičnaja situacyja nazirajecca i ŭ inšych pieravozčykaŭ, va ŭsich sutačnyja za hety čas vyraśli na 5—15 jeŭra», — kaža kiroŭca.
Aŭtaślesar u Bielhii
Biełaruski aŭtaślesar, jaki vachtavym mietadam pracuje ŭ Bielhii, kaža, što jaho zarobak za apošnija miesiacy taksama krychu pavialičyŭsia.
«Pracuju tam užo druhi hod, ciaham 2021-ha, za vyklučeńniem zaviaršeńnia vyprabavalnaha pieryjadu, zarpłata zastavałasia niaźmiennaj. U 2022 hodzie, kali ceny pačali zaŭvažna raści, firma pačała pavyšać zarobki kiroŭcam, a taksama tym, chto absłuhoŭvaje hruzaviki firmy. Ciapier zamiest 50 jeŭra za sutki ja atrymlivaju 60. Pavyšeńnie stavak adbyvałasia dvojčy. Piać jeŭra dadali ŭ lipieni i jašče piać u minułym miesiacy. Pražyvańnie na bazie, jak i raniej, zastajecca biaspłatnym. Vydatki na ježu krychu padraśli, ale za košt rostu zarpłaty ŭ vyniku atrymlivajecca toje samaje. Suma, jakuju ja adpraŭlaju siamji ŭ Biełaruś, zastałasia niaźmiennaj», — kaža ślesar.
Kamientary