Biełaruskich budaŭnikoŭ viarbujuć u Maryupal i Sievieradanieck
Jak stała viadoma «Našaj Nivie», rasijskija viarboŭščyki zaachvočvajuć biełaruskich budaŭnikoŭ da pracy na akupavanych terytoryjach Ukrainy. Isnujuć maršruty na zarobki ŭ Maryupal i Sievieradanieck.
Zamiest razbomblenych damoŭ tam budujucca novyja — najpierš dla rasijskich siłavikoŭ i kałanistaŭ. U pryvatnaści, žytło na «novych terytoryjach» abiacajuć tym kryminalnikam, jakich viarbujuć u turmach dla ŭdziełu ŭ vajnie suprać Ukrainy.
«Biełarusaŭ dakładna nabirajuć u Sievieradanieck i Maryupal. Picierskija i maskoŭskija padradčyki dyrektyŭna atrymali zahady ŭzvodzić tam žyllo, a ŭzamien — abiacańni atrymać smačnyja kavałki pad zabudovu ŭ rasijskich haradach», — patłumačyŭ «Našaj Nivie» ŭdzielnik rynku nieruchomaści.
«Znajści rabaciah na hety kirunak nie tak prosta. U Rasii zaŭsiody pracy było bolš, čym ludziej dla jaje — na jakuju budoŭlu nie pryjedź, paŭsiul pracuje Siaredniaja Azija i Biełaruś. A jechać u takim ekzatyčnym kirunku, viadoma, durnych mała. Tamu nabirajuć pa ŭsioj SND. Ź biełarusami im praściej za ŭsio, bo jany i rasijanie — adzinaja pracoŭnaja prastora, nie treba nijakich dazvołaŭ na rabotu, chapaje pašparta», — dadaŭ naš surazmoŭca.
Ludziam, jakija zarablajuć naboram piersanału ŭ Minsku, za kožnaha pryciahnutaha na budoŭlu ŭ Danbas rasijanie vypłačvajuć premiju, paviedamili «Našaj Nivie» ludzi z hetaj śfiery.
Zarobki biełaruskim budaŭnikam abiacajuć vysokija — da 5 tysiač biełaruskich rubloŭ.
«Ale navat na takija zarobki znajści achvotnych ciažkavata. Cha! Pajedzieš i nazad nie vierniešsia», — skazaŭ «Našaj Nivie» budaŭnik.
Kamientary