Makron znoŭ stelefanavaŭsia z Pucinym, havaryli pra vajnu, Zaparožskuju AES i charčovuju biaśpieku
Siońnia prezident Francyi Emanuel Makron paśla doŭhaha pierapynku znoŭ patelefanavaŭ rasijskamu prezidentu Uładzimiru Pucinu, jany abmierkavali biahučyja prablemy. Asnoŭnaj, jak vyhladaje, było pytańnie biaśpieki na Zaparožskaj atamnaj elektrastancyi.
Miarkujučy pa paviedamleńni na sajcie Kramla, francuzski prezident znoŭ vysłuchaŭ tradycyjny nabor rasijskich prapahandysckich štampaŭ.
Pucin raskazaŭ, što ŭkrainski bok nibyta abstrelvaje Zaparožskuju AES, u tym liku schovišča radyjeaktyŭnych adkidaŭ, nie pastaŭlaje zbožža ŭ krainy Afryki, a taksama vykarystoŭvaje zachodniaje ŭzbrajeńnie dla napadaŭ na hramadzianskuju infrastrukturu.
U svaju čarhu, pres-słužba Jelisiejskaha pałaca paviedamiła, što ŭ razmovie z Pucinym francuzski prezident asudziŭ praciah rasijskich vajskovych apieracyj va Ukrainie i nahadaŭ kiraŭniku RF pra svaje patrabavańni adnosna ich najchutčejšaha spynieńnia, pačatku pieramovaŭ i adnaŭleńnia suvierenitetu i terytaryjalnaj cełasnaści Ukrainy.
Makron taksama nastojvaŭ na nieabchodnaści stvareńnia režymu biaśpieki na Zaparožskaj AES. Jon nahadaŭ, što rasijskaja akupacyja vyklikała toje, što siońnia biaśpieka ZAES znachodzicca pad pahrozaj. Makron zaklikaŭ Pucina vyvieści ciažkaje i lohkaje ŭzbrajeńnie z terytoryi ZAES i vykonvać rekamiendacyi MAHATE adnosna zabieśpiačeńnia biaśpieki jadziernaha abjekta.
Taksama francuzski lidar zakranuŭ temu hłabalnaj charčovaj biaśpieki. Jon nahadaŭ, što sankcyi ES nie raspaŭsiudžvajucca na sielskahaspadarčuju pradukcyju, i mižnarodnyja partniory, asabliva Rasija, niasuć sumiesnuju adkaznaść za pastaŭki praduktaŭ charčavańnia krainam, jakija padviarhajucca najbolšaj ryzycy. Jon padkreśliŭ, što Stambulskaja damoŭlenaść pavinna vykonvacca takim čynam, kab ekspartavanaje zbožža dastavałasia tym, chto ŭ im najbolš za ŭsio maje patrebu.
U Jelisiejskim pałacy taksama adznačyli, što ŭ najbližejšyja dni Makron znoŭ pahavoryć z Pucinym, kab možna było dasiahnuć pahadnieńnia, jakoje harantuje biaśpieku Zaparožskaj AES.
Ciapier čytajuć
Siłaviki zavitvajuć da biełarusaŭ, jakich užo nie mohuć pryciahnuć pa kryminałcy za ŭdzieł u maršach, z maski-šou — dla prafiłaktyki7
Siłaviki zavitvajuć da biełarusaŭ, jakich užo nie mohuć pryciahnuć pa kryminałcy za ŭdzieł u maršach, z maski-šou — dla prafiłaktyki
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary
Časok pohovorił - procientik dobavił.
Ničieho, kak hovoritsia, ličnoho.