U Rasonskim rajonie znajšli cieła žančyny, jakaja prapała dva hady tamu
U kancy žniŭnia mužčyna, jaki žyvie za miažoj, dasłaŭ u biełaruskuju milicyju list z prośbaj dapamahčy znajści jahonuju siastru, jakaja žyvie ŭ Rasonskim rajonie Viciebskaj vobłaści, bo ŭžo dva hady jon nie moža ź joj źviazacca. U vyniku vyśvietliłasia, što žančyna była zabitaja i zakapanaja ŭ dvary svajho doma, paviedamlaje pres-słužba Śledčaha kamiteta.
Milicyjanty padčas pravierki znajšli jaje dom i čałavieka, ź jakim jana žyła raniej. 50-hadovy mužčyna skazaŭ, što sužycielka pamierła jašče ŭ 2020 hodzie, a jon znajšoŭ jaje miortvaj i pachavaŭ u dvary.
Śledča-apieratyŭnaja hrupa ekshumavała pareštki 55-hadovaj žančyny. Byŭ praviedzieny dopyt jaje byłoha sužyciela, jaki raniej byŭ sudzimy za katavańnie, pryčynieńnie mienš ciažkich cialesnych paškodžańniaŭ i ŭchileńnie ad pakarańnia («chimii»).
Padčas dopytu jon pryznaŭsia, što žančyna pamierła nie sama — dva hady tamu padčas svarki jon udaryŭ jaje, a kali zrazumieŭ, što jana pamierła, to, spałochaŭšysia turmy, zakapaŭ cieła ŭ dvary i nikomu pra heta nie kazaŭ.
U dačynieńni da mužčyny raspačali kryminalnuju spravu ab zabojstvie pa č. 1 art. 139 KK. Ciapier jon zatrymany, viaducca śledčyja dziejańni.
Aryštavany 75‑hadovy Źmicier Sańko — vieteran-vydaviec3
Kamientary