Finlandyja i Estonija abjadnajuć sistemy bierahavoj abarony. Heta zakryje Finski zaliŭ dla rasijskaha fłota
Estonija i Finlandyja buduć abjadnoŭvać rakietnyja kompleksy bierahavoj achovy ŭ ramkach płanaŭ abaronnaj intehracyi krain. Pra heta raskazaŭ ministr abarony Estonii Chana Pieŭkur u intervju vydańniu Iltalehti.
«My pavinny intehravać svaje rakietnyja kompleksy bierahavoj abarony. Dalokaść dziejańnia estonskich i finskich rakiet bolšaja, čym šyrynia Finskaha zaliva. Heta aznačaje, što my abjadnajem našu supraćrakietnuju abaronu i budziem dzialicca adzin z adnym usioj infarmacyjaj», — skazaŭ jon.
Kiraŭnik estonskaha abaronnaha viedamstva padkreśliŭ, što heta rašeńnie dazvolić zakryć Finski zaliŭ dla rasijskich vajskovych karabloŭ.
«Bałtyjskaje mora stanie ŭnutranym moram NATA, kali Finlandyja i Šviecyja ŭstupiać u Aljans. Situacyja źmienicca», — pierakanany jon.
U vydańni adznačajuć, što letaś Estonija navažyłasia nabyć izrailskija rakiety Blue Spear dla baraćby z marskimi celami. Dalokaść palotu hetych rakiet — 290 km. Heta aznačaje, što estoncy mohuć vieści svoj rakietny ahoń u luboje miesca na finskim uźbiarežžy ŭ zalivie.
U toj ža čas nabytyja VMS Finlandyi supraćkarabielnyja rakiety MTA 85m (madyfikavanaja dla Finlandyi RBS-15 Mk 2) majuć dalokaść bolš za 100 km i zabiaśpiečanyja radyjołakacyjnaj sistemaj samanaviadzieńnia. Adznačajuć, što finy mohuć zasiarodzić ahoń na paŭnočnym uźbiarežžy Estonii.
Iltalehti nahadvaje, što Finlandyja i Estonija ŭžo płanavali sumiesnuju bierahavuju abaronu jašče ŭ 1930-ch hadach, adnak abiedźvium krainam tady nie chapała sajuźnikaŭ.
Ciapier čytajuć
«Kab kupić dom, pracavała na narkazavodzie». Paśla 2020-ha biełaruska ź piaćciu dziećmi pierajechała ŭ Kanadu10
«Kab kupić dom, pracavała na narkazavodzie». Paśla 2020-ha biełaruska ź piaćciu dziećmi pierajechała ŭ Kanadu
«Adpraŭlali myć tualety i kidali ŭ ŠIZA». Susiedki raskazali pra abychodžańnie ŭ kałonii z eks-palitźniavolenaj Tamaraj Karavaj, jakaja paśla pamierła44
Kamientary